La fotografia mossa la plazza Segantini alla Purmaglera a Savognin, igl li noua tgi Segantini veva installo igl sies tgavalot per malager “L’arada“.

Igl grond e renumo pictour artist Giovanni Segantini (1858-1899) ò vivia ansemen cun sia famiglia, la donna Bice, igls unfants Gottardo, Alberto, Mario e Bianca durant 8 onns digl 1886 anfignen igl 1894 a Savognin e stgaffia cò ena gronda part digls sies maletgs tgi cunaschagn. Segantini era fascino dalla bela cuntrada averta , la gleisch penetronta e la veta simpla dalla populaziun muntagnarda cun lour animals. Cò ena schelta digls pi ancunaschaints maletgs stgaffias a Savognin:

- Ave Maria segl lai

- Matta tgi fò caltschoul

- Costum grischun

- Arada

- Las dus mammas

- Return digl gôd

- Sen loptga

- Mezde sur las alps

- Pastgiras alpinas

Igl maletg Ave Maria segl lai ò en motiv dalla Brianza noua tgi Segantini veva vivia avant d’arrivar an Surses, ma igl maletg è nia fito igl 1886 a Savognin. Remarcabel è tgi sen la gronda part da sies maletgs ins vei la cadagna digl piz Curver ed igl piz Toissa ed adegna puspe igl model, l‘indigena Baba Uffer tgi è stada sur onns la fantschela dalla famiglia. An sies codesch da poesias “Gleisch avonda“ descreiva igl poet indigen Peder Cadotsch barmeir 5 maletgs da Segantini ed igl anteriour dirigent digl Chor viril Surses Gion Giusep Derungs ò fatg las belas cumpusiziuns tgi èn perpetnisadas sen la sagonda platta da grammofon digl chor, “Mond alpin“ digl 1979.

La veia Segantini, la Pro Segantini, la Sala Segantini, la plazza Segantini ed igl crap commemorativ a Tussagn ragordan da sia dimora a Savognin. Deplorablamaintg na dattigl tar nous nign maletg original oter tgi ena skizza tgi el veva fatg per ambeleir la fatscheda principala dalla baselgia parochiala, la lavour n’è pero mai neida exequeida.