Da seniester:

Venzin Pius, Giger Paulina, Pally Martin, Venzin Toni, Pally Maria, Giger Letizia, Bundi Martina, Venzin Clau Martin e Pally Albert

Il suentermiezdi da Gliendisdis Pastgas han nossas convischinas e nos convischins, parents ed amitgs en la vegliadetgna da pensiun danovamein astgau sentupar ad in act musical festiv. Quei denton mo las persunas che festiveschan igl onn 2015 lur natalezis da 75, 80, 85 e 90 onns. Uonn ein 9 giubilaras e giubilars separticipai a quella biala occurrenza dalla Societad da musica. Gia dapi in tschuppel onns organisescha la musica in suentermiezdi pils giubilars. Nossas convischinas e convischins che han gia fatg atras bia en lur veta e mintgin dad els ha sias tut persunalas speronzas, giavischs mo era fastedis e quitaus. Els tuts ein Medelins cun tgierp ed olma, persunas ch'ein s'engaschadas en lur veta pil generallesser en nossa communitad per vitg e vischnaunca. Seigi quei els vischinadis, en uniuns ni en la politica communala.

Cun quei pign schenghetg musical engrazia la Societad da musica per lur engaschi e porta als giubilars sin lur anniversari salids ed auguris musicals.

Giubilars da 90 onns

L`emprema giubilara en sala da scola a Curaglia ha astgau festivar ils 10 da schaner siu 90 avel onn da naschientscha.

La Maria Pally-Beeli, nus tuts numnein la giubilara mo "la Maria digl Eduard", essend chei deva e dat aunc bia Marias ella Val, sa festivar siu natalezi en ina dètg buna sanadad. La Maria ei naschida a Curaglia ella Vella Belvedère osum il vitg. Siu bab ha schau baghegiar la casa sco pensiun da curants. Cun mo 14 onns sto la giubilara surprender, suenter la mort annetga dalla mumma, dabia responsabladad. Per ils 5 fargliuns sesprova ella da remplazzar lur mumma schi bein sco pusseivel. Igl onn 1949 marida la Maria il giuven Eduard Pally. 8 affons han procurau per bia variaziun, quitau e lavur. Duas ga han ils geniturs stuiu prender cumiau din affon mintgamai cuort suenter la naschientsch. La gronda lavur en casa, sil funs e sco cuschiniera els hotels dil vitg ed en Tgasa S. Clau han mai stermentau ella. Igl onn 1997 miera siu um, igl Eduard ed ella resta anavos persula. Aschiditg sco la sanadad ha schau tier eis ella s'engaschada en mazzlaria dil fegl Beno. Oz gauda la Maria mintga gievgia ensemen cun ses cumpogns in scart troccas. Il 90 avel ha ella festivau cun grond tschaffen el ravugl da si'entira famiglia.

Il proxim giubilar ei 9 meins e 13 dis pli giuvens che la Maria, il Martin Pally. Il Martin ei naschius ils 23 doctober 1925 a Platta sco quart da 12 affons da Cecilia e Paulin Pally-Giossi. Sco fegl vegl ha ei giu num baul da segidar culs geniturs el menaschi puril. Cun siu transporter Aebi entupv'ins el meinsvart sin via. El ei staus cun tgierp ed olma pur. Mo a mises si Pardatsch eis el mai serendius bugen. Cunquei ch'il Martin habitava gest sper il santeri da sogn Martin eis el segidaus entuorn 15 onns mintgamai allas sepulturas. Pér ella vegliadetgna da varga 70 onns eis el sedistaccaus da siu carezzau muvel. Els onns suenter entupavan ins il Martin mintgadi da tutt'aura per nossas vias e sendas entuorn. El caminava sco in giuvenot e fageva liungas spassegiadas a pei. Cu el ei serendius igl onn 2010 en casa da tgira Sursassiala a Mustér havess el ualticarteivel buca sminau da stuer midar aunc duas ga casa en sia vegliadetgna. Igl onn 2012 ha el stuiu serender en Tgasa Sontgaclau a Curaglia ed igl onn 2014 puspei il retuorn en Casa Puntreis a Mustér. El gauda leu ina buna cumpignia. Sias spassegiadas ha el denton era leu buca reduciu, ellas ein forsa vegnidas intec pli cuortas en la vegliadetgna. Gia a Curaglia ed ussa a Mustér entaupan ins mintg'avonmiezdi ellustria dil vitg il Martin tier siu caffe e tier ina paterlada culs vischins. Sin la damonda co el sesenti en Casa Puntreis ha il Martin rispundiu:" Jeu hai dètg bien ed ei fan stupent cun mei. Denton enzatgei ditgel jeu a Ti. Va en casa da vegls pér cu Ti stoss!" Per el che ha manischau biars onns ensemen cun sia quinada Victoria il mintgadi a Platta ei quei secapescha stau ina gronda midada.

Dus ulterius giubilars han deplorablamein buca saviu dar suatientscha agl invit. Quei ein la Flepp-Flepp Antonia ed il Pally Gion, omisdus da Curaglia.

Giubilars dad 85 onns

Igl emprem giubilar festivescha ils 9 da matg siu 85avel onn da naschientscha, numnadamein il padrin dalla bandiera dalla Societad da musica Medel/Lucmagn. Il Clau Martin Venzin da Drual. Las musicantas ed ils musicants han giu in spezial plascher ch'il Clau Martin ei serendius naven dalla Tgasa Sogn Giusep a Cumpadials a Curaglia. Naschius eis el a Drual. Ensemen cun las duas soras, Martina e Carmelia eis el carschius si en ina mudesta famiglia purila. Luvrar e far oraziun era da quei temps igl impurtont. Vacanzas deva ei buc ed ei veva num da segidar mintgadi vid il menaschi puril. Suenter ils onns da scola stat il Clau vinavon a casa e segida culs geniturs. El tgira ils geniturs tochen lur mort. Sia clamada ei adina stada da far il pur, e quei cun tgierp ed olma. Cun la vegliadetgna arrivan denton era ils mals. Il Clau Martin ha fatg part el Cussegl da vischnaunca da Medel ed ha era presidiau entgins onns la pleiv. Plinavon eis el era staus biars onns meinacudisch dalla Societad da tratga da biestga Platta.

Gl'onn 2009 surpren il giubilar ina fetg biala ed impurtonta incarica per la Societad da musica Medel/Lucmagn. El seporscha sco padrin dalla nova bandiera. Per las musicantas ed ils musicants ina gronda honur ch'els schazegian da tut cor. Il schaner 2014 sto il Clau far il pass en casa da vegls e serenda a Cumpadials en casa S. Giusep. Schar anavos la casa, ses clavaus e siu pign menaschi puril a Drual ei buca lev e fa mal il cor. En casa Sogn Giusep passenta el ussa sia sera sontga ed ha beinenqualga visetas ord la val Medel.

Nossa proxima giubilara d`85 ei la Martina Bundi-Pally. La Martina ei naschida ils 20 da fenadur 1930 a Platta sco 5avel affon da Baseli e Margreta Pally-Bundi. Ensemen cun ses geniturs, fargliuns ed igl aug Gion steva ella a Platta en casa dalla Posta. La qualla deva suttetg ad aunc 2 autras famiglias. Tuttas treis famiglias ensemen dumbravan a sias uras buca meins che 34 dels. Ils onns da scola primara frequenta la giubilara a Platta e la secundara lu a Curaglia. Suenter ver finiu la scola banduna la giubilara per plirs onns la Val e serenda sco fumitgasa per far il percasa a Dardin, Cuera e Basilea. Igl onn 1957 marida ella il giuven Luis Bundi da Mutschnengia e pren domicil ella casa davos caplutta. La Martina ei mumma da 6 buobs. Cun mo buobs en casa han quels secapescha giu da segidar el tenercasa. Lavurs che fussen plitost stadas adattadas per buobas. Denton quei ha nuota fatg donn ad els. Suenter la mort digl um segida ella vinavon cun tgierp ed olma culs fegls vid las lavurs sil menaschi puril. Oz pren ella intec pli ruasseivel il mintgadi. Ella segida sco ella po cul fegl Martin da far fein e selegra dallas visetas dils beadis. Ina gronda pissiun ha la giubilara aunc, numnadamein sias gaglinas ch'ella puprogna ad in pupergnar.

Era ils giubilars da 85 ein buca serimnai en retschas serradas. Pally-GigerTresa da Mutschnengia, Venzin Rosa da Drual e Lutz-Flepp Rosa da Curaglia han deplorablamein buca saviu vegnir alla fiasta en sala da scola a Curaglia.

Giubilars dad 80 onns

Letizia Giger-Giger astga festivar ils 19 da matg siu natalezi rodund. L'onda Letizia ei naschida igl onn 1935 sco emprem affon da Giusep ed Agata Giger-Bearth a Pardé. Cheu ha ella passentau si`affonza el ravugl da ses 5 fargliuns. Suenter ils onns da scola hai giu num da fadigiar sezza il paun da mintgadi. Aschia ei l'onda Letizia serendida en differents hotels sco cameriera giu la bassa. Ella ha adina schazegiau il contact cul concarstgaun. Quei ei buca semidau entochen il di dad oz. Igl onn 1959 marida ella il giuven Giusep Giger da Pardé. Lur lètg ei vegnida benedida cun 5 affons. Ensemen cun siu um ha ella surpriu il puresser ed ei stada cun tgierp ed olma pura, dunna da casa mo surtut mumma. Igl onn 2005 piarda ella tut surura siu mariu, igl aug Sep. Quei ei stau ina greva crusch per l'onda e sia famiglia. Oz gauda la Letizia il mintgadi cun far spassegiadas, ir inaga ad jamna a gimnastica e dar troccas. Ella gauda da star da cumpignia e dar ina paterlada. Siu hobby preferiu ei siu iert, las flurs ed il Findus, il giat che fa cuorturiala ad ella. Ella selegra da mintga viseta dils affons e beadis e dapi 4 meins astga ella senumnar basatta dalla pintga Jael. Mintga stad entaup'ins l'onda aunc sil frust a gidar siu fegl Werner a far fein, ina dunna cun'in immensa energia.

Exact in meins pli tard che l'onda Letizia festivescha Paulina Giger siu 80avel onn da naschientscha. La Paulina ei naschida ils 19 da zercladur sco veglia dils 9 affons dAlfons e Maria Giger-Venzin. Suenter ils onns da scola a Curaglia annunzia il scolast la giuvna Paulina a Bogn Ragaz ella scola da secretaria. Ella serenda suenter tier siu aug sur Benedetg a Sviz el collegi sco telefonista ed emploiada en ladministraziun. Igl onn 1957 tuorna la Paulina puspei anavos en Val Medel e lavura vi Pali per las Ovras electricas Rein Anteriur. In plaz da lavur cun bia luvrers jasters cun ils quals ella segidava bugen. Per quei agid eran ils luvrers fetg engrazieivels, essend lunsch naven da casa e da lur famiglias. Aunc oz ha ella contact cun entgins dils luvrers talians. La giubilara lavura suenter a Glion ed a Landquart. A Landquart lavura la Paulina en fabrica da pupi el biro da persunal. Ulteriuramein surpren ella il post samaritan per ca. 250 luvrers da 13 naziuns. Igl onn 1991 tuorna la Paulina a Curaglia essend ch`ils geniturs drovan siu agid. Ella s'engascha en diversas uniuns sco cassiera. Per la vischnaunca fa ella revisura e pli tard eis ella ina dallas empremas dunnas el Cussegl da vischnaunca.

30 onns eis ella cun tgierp ed olma samaritana. Grond plascher ha ella giu dalla medaglia Henri Dunant e sco commembra dhonur a Landquart e Medel. La Paulina ha era rimnau fetg bia scartiras e fatgs da pli baul. Sch'ins drova enzatgei da pli da vegl sche ha la Paulina adina la dretga risposta. Cun agid da siu frar Gallus, dallIrma ed entginas bunas vischinas gauda ella il mintgadi a casa e la gievgia gauda ella el Hotel Vallatscha in bien gentar ed in scart troccas.

Il giuven denter ils giubilars d80 ei il **Toni Venzin-Bearth.** El ei naschius ils 11 doctober sco emprem affon da Giachen e Maria Tresa Venzin. Ensemen culs 5 fargliuns passenta el ina bialaffonza a Pardé. Suenter ils onns da scola ha il giubilar luvrau e segidau el menaschi puril, ius ad alp ed els uauls Medelins sco luvrer dual. Denton eis el era staus ella bassa sco fumegl. Igl onn 1964 marida el la giuvna Maria Bearth. 4 affons ein naschi ella famiglia. Fetg biars onns ei il Toni staus in luvrer zun appreziaus tier la gruppa communala enta Medel. Il Toni saveva atgnamein far diltut. Naven da construcziuns en lenn, construcziuns en crap, luvrar cun slondas ed aunc fetg bia auter. Sia gronda pissiun era ed ei aunc adina il luvrar cun lenn en siu luvratori sur casa a Curaglia. Ira per cristallas ei stau ina gronda pissiun dad el ed oz ha siu fegl Gabriel artau quella pissiun. Il Toni ei era s'engaschaus biars onns el museum da Cristallas en Tgasa Lucmagn. Ina gronda frida e sperdita ha il Toni stuiu supportar igl onn vargau. Sia carezzada dunna Maria ei morta suenter in liung temps da suffrientscha. Uss gauda el il temps cun sia famiglia, il far lenna ni leger. Las spassegiadas ella natira datten al giubilar forza a tgierp ed olma.

Giubilars da 75 onns

Glemprem giubilar da 75 al qual la musica ha purtau in salid musical ei igl **Albert Pally da Platta.** El festivescha ils 9 duost siu 75avel anniversari. Naschius a Platta sco pign dalla famiglia da Baseli e Margreta Pally-Bundi ha el passentau ina bial'affonza en casa dalla Posta. Las scolas primaras frequenta el a Platta e las secundaras a Curaglia. Suenter ils onns da scola serenda el igl onn 1959 a Churwalden per far igl emprendissadi da fravi, il qual el finescha cun success. El tuorna ella regiun e lavura tier differentas fatschentas sco fravi. Zacontas stads eis el schizun staus ad alp. Dapi varga 30 onns ei glAlbert fravi passiunau cun atgna fatschenta a Platta e fa aunc oz differentas lavurs en siu mistregn. Lunsch entuorn eis el enconuschents e respectaus sco ver artist da crear cruschs fossa. Contas uras ch'el ha passentau e passenta aunc adina en sia fravia, gliez ei ualticarteivel buca pusseivel d'erruir. Igl Albert dat bugen troccas e gauda ils buns gentars chel survegn di per di da sia sora Maria a Curaglia. Per el munta quei in pèr uras da cumpignia e da buns discuors.

Il giubilar giuven ella retscha dils 75 festivescha ils 23 da settember siu natalezi. Il Pius Venzin da Pardé. Miu vischin entaup'ins adina cun buna luna. Pli baul haveva el biars onns en nuegl sper nossa casa cauras ed in buc. Quei stoda buc temevel jeu scol giavel. Per ina tuffava quel sgarscheivel e per l'autra haveva quel corna ch'ins stueva temer el. Dapi chil Pius haveva vendiu sias cauras possedeva el tochen avon paucs onns aunc nuorsas. Tier la gruppa forestala dalla vischnaunca ha el luvrau entginas stagiuns. Da far lenna san ins emprender aunc oz dil Pius ina massa. Dapi ch`il giubilar ha buca sias nuorsas pli ha el era pli bia temps per in bien discuors. Il cuschinar ei daventau pil Pius in grond hobby. Sias cocas da meila seigen las meglieras lunsch entuorn, quei ha sia niazza Cornelia raquintau. Persunalmein haiel aunc buca astgau empruar ellas, mo tgisà, quei ch'ei buc sa aunc vegnir.

Era ils giubilars da 75 ein serendi cumpleinamein en sala da scola, pertgei en vischnaunca ein mo dus d'els sesents.

A tuts giubilars giavischein nus aunc bia dis ed onns da sulegl e principalmein en buna sanadad. Che vus saveies guder il mintgadi e sias bellezias. Possi il Tutpussent accumpigniar vus vinavon e che vus perdeies mai la cardientscha, la carezia e la speronza - quellas treis vertids che duessan accumpignar nus tuts el mintgadi.

La Societad da musica ha mintgamai sunau entgins bials tocs pils giubilars. In pign schenghetg en fuorma d'in glas mèl d'aviuls ha la musica surdau a mintgin. Silsuenter eis ei vegniu offeriu caffe ed in bien toc tuorta a tuts presents. En num dils giubilars e lur famiglias engraziel jeu cordialmein alla Societad da musica Medel/Lucmagn cun lur presidenta Silvana Monn per quella cordiala purschida musicala. Ina biala sentupada cun buns discuors ha priu sia fin encunter sera culs davos ein serendi cuntents encunter casa.

Giger Ciprian