Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
La pagina tetgala: historiaHelvetica

Las diesch reglas d'aur

Cun nossaistorgia.ch envidain nus Vus da participar ad in project unic: dar vita a l'istorgia da Grischun e da la Rumantschia cun Vossa atgna istorgia. Sin questa plattafurma pudais Vus publitgar e parter Voss archivs digitalisads, rediger artitgels, scriver commentaris, dar likes a cuntegns da la plattafurma, crear e cumplettar collecziuns tematicas e sa chapescha communitgar cun ils auters commembers. Sutvart suondan las diesch reglas d'aur che As permettan da profitar cumplainamain da nossaistorgia.ch.

Scuvrir a bainplaschair

Prendai il temp da scuvrir la plattafurma cun ses documents, sias collecziuns e ses commembers. Tschertgai tenor Voss giavischs ed interess. Vus pudais fufragnar en las collecziuns tematicas, retschertgar tenor ils tags (Stichwörter) principals ubain utilisar ils differents chavalets. Questa navigaziun intuitiva As permetta d'emprender d'enconuscher meglier l'intent da la plattafurma, ses funcziunament e ses stgazis.

Prendai il temp!

Nagin temp per nossaistorgia? Vus vegnis a constatar ch'il temp che Vus passentais sin nossaistorgia.ch è in temp empernaivel ed interessant. E pir il plaschair da vesair online Voss agens documents, dad esser quella u quel che dat vinavant l'istorgia da Vossa famiglia en in ambient plain respect ed ensemen cun auters commembers, cun ils quals Vus pudais barattar experientschas e cuntegns.


Publitgar è fitg simpel

Per metter online Voss cuntegns digitalisads avain nus sviluppà ina via simpla e cumplessiva. In pèr infurmaziuns nizzaivlas da Vossa vart per tuts dovri però tuttina, per exempel il titel, la data (sche Vus enconuschais ella, u almain l’onn), ina descripziun infurmativa e la localisaziun geografica dal document (nua ch'el è vegnì creà a sias uras). Questas infurmaziuns dattan ina plivalur a Voss cuntegn ed enritgeschan el per Vus e per ils auters utilisaders.

Tgi, cura, pertge, nua? Quellas dumondas As gidan

Cura che Vus mettais online Voss documents, n'emblidai betg d'als cumplettar cun infurmaziuns che gidan ils auters utilisaders da chapir els e che faciliteschan la retschertga.

Titel

Tgi è sin il maletg? Dar in curt titel. Il titel duai provotgar il visitader da la pagina da cliccar sin l'artitgel. El duai esser in eye-catcher - pia crudar en egl e far marveglia.

Datum

Cura è questa fotografia vegnida fatga? I n'è betg adina simpel da savair la data exacta d'ina fotografia veglia. Ma mintgatant basta l'onn – forsa che lez è nudà sin la vart davos – sche betg, empruvai dad inditgar il decenni. Guardai bain Voss document, Vus chattais franc in detagl che As tradescha la vegliadetgna, forsa in vestgì, ina mobiglia, il model d'in auto. Ubain che auters commembers pon gidar. Dumandai els!

Raquint tar il document

Raquintai ina curta instorgia tar il document. Pertge è questa fotografia vegnida fatga, a tge chaschun? Vus avais franc ina regurdanza, in'anecdota u in raquint che dat scleriment.

Localisar il document

Nua è la fotografia vegnida fatga? Il lieu è in'infurmaziun fitg nizzaivla, en spezial per l'utensil da geolocalisaziun da la plattafurma. Cun quest agid èsi pussaivel da scuvrir auters maletgs fatgs en quest lieu in auter temp. Vus vegnis a vesair co ch'ils documents entran en in dialog e s'enritgeschan vicendaivlamain.

nossaistorgia.ch è ina cuminanza

nossaistorgia.ch è ina gronda e ferma cuminanza. I dat pliras pussaivladads dad entrar en contact cun auters commembers, per exempel cun suandar ina persuna che publitgescha cuntegns u cun activitads che As plaschan, cun far likes u cun suandar tags. I dat er in forum per barattar cussegls, experientschas ed infurmaziuns. Noss curatur Flavio Huonder gida gugent. Na targlinai betg da scriver ad el u da contactar el era via il forum. Per email: info@nossaistorgia.ch.

Ah, la dumonda dals dretgs … nagina panica!

Ils documents publitgads sin nossaistorgia.ch èn suttamess al dretg d'autur. Quai signifitga che Vus stuais esser l'autur ubain avair il dretg dal cuntegn che Vus partais. Quai para evident, damai che Vus contribuis las fotografias da Voss album da famiglia. Ma i dat era documents vegls che n'èn betg suttamess ad in dretg. Oravant tut èn quai documents che tutgan a la domena publica. Quai capita 70 onns suenter la mort da lur autur. Vus stuais medemamain verifitgar che Vus respectais ils dretgs da la persunalitad, en spezial il dretg da l'agen maletg ed ils dretgs musicals. La dumonda dals dretgs para cumplexa. Ma nagina panica, noss moderatur gida gugent.

«Fake news»? Natiralmain betg!

Nus essan segirs che Vus appreziais sco nus l'exactadad, la precisiun e la vardaivladad dals fatgs. Tut va bler pli tgunsch cun la vardad. Faschai pia la bregia da verifitgar Vossas contribuziuns uschè conscienziusamain sco pussaivel. Ma As senti liber da scriver en Vossa moda e maniera, dad exprimer Voss agens patratgs, quai renda Vossa participaziun anc pli autentica.

L'interacziun è anc meglra che mo la publicaziun

Vus pudais deponer e modifitgar facilmain Voss cuntegns. Quai è la moda la pli simpla da dar valur a Voss archivs. La plattafurma porscha dentant anc autras pussaivladads, p.ex. crear collecziuns tematicas. Il fatg che Voss cuntegns vegnan publitgads sper ils documents dad auters commembers u documents dad archivs d'instituziuns dat ad els ina nova dimensiun. Vossas contribuziuns vegnan messas en in context istoric, quel da l'istorgia dal Grischun. Creai pia Vossas collecziuns e rendai ellas accessiblas per ils auters utilisaders, partai Voss archivs e dai vita ad els.

Messadis per betg perder il fil … da l'istorgia

Grazia al sistem da messadis retschavais Vus infurmaziuns davart las activitads principalas che concernan Vus, Voss documents u ils commembers che Vus suandais. Sch'ils messadis èn memia mulestus, pudais Vus configurar els tenor Voss basegns en Voss profil.

Faschai enconuschent nossaistorgia.ch

Nus vulain esser enconuschents il meglier pussaivel en tut las valladas dal Grischun e survegnir novs commembers. Nus essan engraziaivels, sche Vus derasais infurmaziuns davart nossaistorgia.ch en il ravugl da Vossa famiglia e da Voss amis. Quai sustegna era Voss agen engaschament e quel da l'entira cuminanza da nossaistorgia.ch.

Network:
Sponsurs:
16,124
807
© 2024 FONSART. Tut ils dretgs resalvads. Dissegnà da High on Pixels.