Da Buania eis ei usit ch’ils treis sogns retgs visetan vitg e val. Tier nus enta Medel ei quei stau gia biars onns aschia. Oz denton cu la vischnaunca posseda buca pli ina scola ei quei buca garantiu pli.

Uonn 2020 havein nus perencunter danovamein survegniu viseta dils treis sogns retgs Melchior, Caspar e Balthasar. Na, tier nus ein 7 reginas vegnidas ed han delectau vischinas e vischins cun ina bellezia canzun en duas vuschs. Quellas reginas han fatg tutta honur al Bambin. La canzun ei vegnida creada cun maun liber da nossa anteriura scolasta Evelina Giger.

Organisau la fiasta da Buania ha la mussadra Petra Pally. Allas giuvnas ch’ein s’engaschadas e che han purtau a vischinas e vischins medelins quei bi usit e quella biala canzun, ellas che van tuttas a Mustér a scola ed era el gimnasi, ad ellas auda in zun grond cumpliment ed engraziament. Bravo!

La canzun ha l’Evelina creau sur dil tema d’arver il cor e schenghegiar al concarstgaun en miseria carezia e peda mo era beins materials e finanzials per tgi che sa. La collecta vegn surdada alla casa d’affons a Peru, Urpi Wasi.

Cheu il text che las reginas han cantau cun lur cors aviarts:

1.

Nus essan ils sabis e viadi fagein.

La glisch splenduronta bugen suandein.

En stalla catein gl’affon zun carin.

Cun stem’e respect salidein il bambin.

2.

En gronda pupira ei Jesus naschius.

Per nus tuts spindrar cheu sil mund s’el vegnius.

Aunc oz en nies temps ei dat paupradad,

perquei appelein a vies spért da buontad.

3.

Pudeies uss arver vies cor e vos mauns.

Levgiar la miseria da bia concarstgauns.

Per vus implorein dil car sogn affon.

La benedicziun ed in bien niev onn.