Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
„La historia dil pac tgietschen“

„La historia dil pac tgietschen“

December 6th, 2016
Ciprian Giger
Ciprian Giger

Ils affons cul "pac tgietschen"

Gliendisdis sera, ils 12 da december 2016 han l'Uniun da dunnas e las classas primaras dalla 2. tochen la 6. classa festivau l'arrivada dalla glisch dalla pasch ensemen cun Rorate.

Sur Giusep Venzin e scolasta Evelina Giger havevan preparau ina fiasta tut apparti. Il tema dalla messa ei stau la historia dil pac tgietschen. Quella historia ei vegnida translatada dil tudestg da nossa scolasta Evelina. Tuts scolars han exercitau la messa e lur presentaziun en scola. Sur Giusep ha astgau celebrar las parts tradiziunalas dalla messa. Ils affons ein stai el center ed han embelliu dall'entschatta tochen alla fin quei survetsch Divin. Secapescha han ils affons era sunau ils differents instruments ed han aschia dau alla fiasta ina biala e graziusa tempra da Nadal.

Davontier sils scalems, en baselgia da Sontga Clau, ein ils affons sepresentai als presents ed han entschiet la fiasta cun la biala canzun da Gion Balzer Casanova (musica) e Conradin Giger (text) "Pasch da Nadal". Quei ha tschaffau igl auditori veseivlamein.

Il pac tgietschen

Tier la historia dil pac tgietschen ei vegniu mussau maletgs sin ina tenda. Davontier sper igl altar sesanflava in grond pac tgietschen. Cheu ina pintga resumaziun da quella biala historietta:" La beadia Anna vegn e festivescha Nadal tier sia tatta. Ella selegra fetg. La sera vegn la tatta en stiva cun in bi pac tgietschen e dat quel a sia beadia cun la cundiziun ch'ella astgi buca arver tal. Quei pac cuntegni in misteri e sch'ins arvi quel lu mondi gl'entir cuntegn a piarder. Ellas duas serendan l'auter di el vitg ed entaupan igl emprem il bostger. Anna surdat al bostger il pac e di ad el il medem sco la tatta haveva raquintau ad ella. Mo il bostger vul saver per tut prezi tgei ch'ei seigi lien. La tatta declara ad el che quei pac cuntegni cletg, cuntentientscha, pasch, temps e peda in per l'auter, sco era glisch interna che dat nova speronza. Speronza che tut daventi bien. Ellas duas surlaien il pac al bostger e van vinavon. Ed aschia va il pac d'in maun en l'auter tras igl entir vitg. Ils vischins ein incantai dil misteri e tuts ein era perschuadi che quei pac ch'els survegnan gidi els el mintgadi.

Quellas vertits ch'ein el pac ein oz per nus tuts da gronda impurtonza, principalmein uss el temps da Nadal. Aschia ha il pac era fatg la runda en baselgia Sontgaclau e mintgin ha astgau prender mentalmein enzatgei ord quei pac, enzatgei ch'el sa duvrar il mument per sesez e lu render il pac en pasch al vischin.

Ils affons han preparau in pac tgietschen per mintga baselgia e caplutta. Quel accumpogna la glisch dalla pasch e quel astga vegnir aviarts. En leu han ils scolars deponiu buns gaivischs per in e scadin. Tgi che viseta capluttas e baselgias astga era prender cun el in da quels giavischs.

Suenter la messa ha l'Uniun da dunnas organisau in pign apperetiv avon baselgia. Da temperaturas plitost migeivlas ein tuts presents separticipai a quella purschida. In'occasiun speciala ha danovamein delectau ils cors dils presents e tuts ein serendi cuntents e leds a casa. La scolasta Evelina e siu team da scola ensemen cun l'Uniun da dunnas han creau cun quell'occasiun ina biala e digna fiasta. En num da tuts presents in grond "Dieus paghi" per quei bi survetsch el temps d'Advent.

Ciprian Giger

Ti stos esser connectà per agiuntar in commentari
Nagin commentari il mument