Inauguraziun dil niev autoscala dils Pumpiers Sursassiala

Sonda, ils 28 da matg ei stau in di tut special pils Pumpiers Sursassiala. Il niev autoscala, ch’els han gia astgau retscheiver entginas jamnas avon, ei vegnius inauguraus e benedius. En quei connex han ils pumpiers organisau in di da fiasta, in di da sentupada, in di per la populaziun da vegnir e mirar il material ch’ei avon maun. Bia gadas vegn ei politisau sur la finanziaziun e tgei che nos pumpiers cuostan. Ni forsa era tgei ch’els astgassen custar?

Quella sonda ei il pievel indigen vegnius envidaus da gest saver seperschuader sez nua ils daners pils pumpiers vegnan impundi. Il niev autoscala dalla marca Mercedes remplazza il vegl ch’ils pumpiers havevan acquistau avon bunamein 15 onns. Tal sesanflava en ina vegliadetgna critica. Quei vul dir, las reparaturas vegnevan adina pli custeivlas ed ins survegneva strusch pli la tocca per reparar la scala ed il vehichel.

Quei vehichel ha denton surviu cumpleinamein pil diever da nos pumpiers. Oz ei la tecnica sesviluppada enorm sch’ins cumpareglia tala cugl autoscala vegl che dumbrava varga 30 onns. La scala sil niev vehichel san ins prolunghir sin 32 meters altezia. Il camiun ei vegnius furnius cun la pli nova tecnica da segirtad. Cameras davon e davos, sensurs che controlleschan mintga manipulaziun ed aunc fetg bia auter.

Dils cuosts ha la segirada da baghetgs dil cantun Grischun surpriu ina cumpart da 50%. Markus Feltscher, il directur dall’Assicuranza da baghetgs GVG dil cantun Grischun, ha menziunau en siu plaid festiv l’impurtonza dalla basa da Pumpiers Sursassiala. El ha constatau ch’ils pumpiers, sut il commando da Gion Tenner, seigien s’avanzai ad in corp da pumpiers exemplaric el cantun Grischun.

Cheu astga il cumandant Gion esser loschs e raccoltar las arbagias suenter biars onns da buna lavur fundamentala. Esther Koch la presidenta dils Pumpiers Sursassiala ha menziunau l’impurtonza da quella nova investiziun mo era engraziau als pumpiers per lur nunstunclenteivel engaschi. Il davos han ils treis plevons sur Tomas Arkuszewski, sur Georg Changeth e ser Roland Just implorau la benedicziun divina pil vehichel niev ch’ei vegnius battiaus sil num „Gada“.

Igl ei stau in di festiv en tuts graus. Nus havein saviu seperschuader d’ina fetg buna organisaziun dils Pumpiers Sursassiala. Da material sil pli niev stan e d’ina motivaziun dils pumpiers ch’ei en bia graus exemplarica. Markus Feltscher ha giavischau en siu plaid als pumpiers biars e buns salvaments cun success. Jeu giavischel als Pumpiers Sursassiala ch’els stoppien mai duvrar igl autoscala en in seracass, denton biars e buns exercezis. In augment d’agid considerabel en bia situaziuns ei quei autoscala en mintga cass.

A tuts pumpiers da nies corp Sursassiala auda in grond „Dieus paghi“ per vies survetsch da di e notg, da biala e da schliatt’aura e quei sur igl entir onn ora.

Ciprian Giger