La veglia punt dalla senda da sauma a Stgegia
La veglia punt dalla senda da sauma a Stgegia
La veglia punt dalla senda da sauma a Stgegia
Sut la staziun dalla pendiculara dall'armada Svizra, dado l'alp Stgegia, sesanfla ina veglia punt da maulta ord crappa naturala. Tala posseda dus arviuls plats da differenta grondezia. Quella veglia punt meina sur la giuvna Froda.
La Froda ei il num dil flum da Medel tochen a Pardatsch, nua il flum da Cristallina sbucca ella Froda. Naven da leu senumna il flum; Rein da Medel.
Il pilaster central ei vegnius construis sin in carpun che sesanfla el letg dil flum. En tal sesanflan duas ruosnas quadratas nua il pilaster ei vegnius francaus. Il vial dalla punt ei 1-1.5 meters lads e posseda ina sulada da crappa naturala. Las crunas dil mir ch'ein dretg e seniester sco tschabergals sin la punt han in'altezia da bunamein 1 meter. Talas eran avon la davosa restauraziun dalla punt ligiadas giu cun zement.
Igl onn exact cu la punt ei vegnida construida ei buca documentaus. Egl archiv dalla vischnaunca da Medel/Lucmagn indicheschan veglias scartiras che la punt seigi vegnida construida entuorn ils onns 1700. La veglia senda da sauma menava tochen igl onn 1877 sur quella punt. Naven da quei temps surveva la punt all'alp Stgegia. Denton era bia viandonts viandavan sur quella punt per ira sul Lucmagn
Sin ina carta digl onn 1859 vegn quei tschancun tochen sil pass figuraus. La nova senda naven da Platta tochen sils cunfins Tessines ei vegnida construida pér ils onns 1876/77. Aschia ha la veglia senda da sauma stuiu vegnir unfrida sin gronds tschancuns. Tgei ch'ei aunc restau, e survescha oz sco senda da viandar, ei la veglia punt sur la Froda e vinavon aunc in cuort tschancun.
Ina foto da pli baul:
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.