Dumengia, ils 8 da matg da bellezi’aura, sco las biaras ils davos meins, han ils empremcommunicants astgau festivar lur grond di. Cunquei che sur Alexi Manetsch pastorescha pliras pleivs, ei il termin per Dumengi’alva vegniu celebraus in’jamna pli tard. Uonn han 5 affons retschiert per l’emprema ga la sontga communiun. Quei ein Jasmin Venzin da Fuorns, Danilo Giger da Pardé, Anita Venzin da Mutschnengia, Larissa Gienal e Luca Pally da Curaglia. Ils affons selegravan tut apparti ed ord lur fatschas resplendava gronda legria per il di da Dumengi’alva. Ils premcommunicants ein vegni accumpigniai dalla societad da musica naven dalla via principala tochen en baselgia.

La baselgia parochiala da sogn Martin era embellida tut apparti bein. All’entrada haveva la calustra Alfonsina Lutz plazzau bials ornaments da flurs.

Sur Alexi beneventa tuts presents, principalmein denton ils premcommunicants cordialmein a lur grond di. El ha celebrau la messa festiva cun sia ferma vusch ed ordvart dign, sco quei che nus essan disai da nies bien augsegner. Enstagl d’in priedi han ils affons presentau als presents ina historia. Nossa catecheta Barla Biscuolm ha luvrau cun ils affons e preparau els sin lur grond di. Ils premcommunicants han mintgin presentau al pievel entginas episodas ord la praula d’ina pintga princessa cul num Suleica ed ina dunna veglia, che fageva in buontad paun. Quei paun era per Suleica tut specials. Clar e bein han ils affons presentau quella praula als presents. Ils affons da scola cun lur scolasta Evelina Giger han embelliu il survetsch divin cun bialas canzuns. Accumpigniai ein els vegni dil chor mischedau. Igl ei stau ina biala fiasta e vegn segirafranc aunc ditg a restar en memoria.