Mal ils peis, la detta ei bunamein schellada en ed il cantar vegn era pli e pli bufatgs. Ei ha num tener la dira, els calan buca si. Dapi entginas uras ein ils affons gia sin via per delectar tuttas casadas en vischnaunca. Els, ch’ein setratgs en sco ils sabis digl orient, ils quals els representan. Mintga casada en mintga uclaun vegn visitada. Perfin tier ils jasters ch’ein cheu en vacanzas quels dis vegn ei spluntau. Tuts enconuschan buca igl usit da giavischar in bien niev onn da Buania e da festivar il di dils treis sogns retgs. Aschia arvan era buca tuts igl esch casa. Ils auters vulan suenter haver tedlau las canzuns dils retgs gnanc dar ina bunamana, tuttina arva mintgin la buorsa e dat enzatgei.

Mo cheu havein nus gia l’emprema cuntradicziun. En emprema lingia vegn festivau la manifestaziun dil bambin, pia da Jesus. Buca Caspar, Melchior e Balthasar duein vegnir festivai mobein l‘arrivada da Niessegner. La tradiziun muossa denton, ch’ils treis sogns retgs audan en nossa regiun tier Buania ed ei vegn era festivau ils retgs. Igl usit dalla petta ni tuorta da Buania cun en mintgamai mo ina cruna, muossa quei claramein.

Nus enta Medel visetan 6 retgs ed in pastur. Ei quei ussa veramein diltuttafatg dasperas? Sur dils treis sogns retgs vegn speculau bia e scret ualticarteivel aunc bia dapli. Oz essan nus cuntents mo sche nus savein mussar si ner sin alv, co la historia ei succedida. Quei ei la realitad. En in document ualti vegl da miu tat haiel anflau in passus che descriva, ch’ei eri ualticarteivel denter treis e dudisch retgs! Basta, aschia ein era nos 6 retgs enta Medel giustificai.

Tgei ch’ei aunc interessant ein ils nums dils retgs. Caspar ei in num dalla Persia e munta presapauc il tresorier (Schatzmeister). Balthasar ei in num babylonic – hebraic e munta „Diu schanegia sia veta“. Melchior perencunter vegn dil hebraic e munta „retg dalla glisch“. En tiara Tudestga ed en l’Austria ei mintgamai ils 6 da schaner in firau. En Svizra deplorablamein buc.

La scolasta ha partiu si ils retgs en duas gruppas per aschia visitar pli speditiv nossa vallada, ch’ei dil reminent aunc dètg spatitschada. L’aura ei veramein stada tut auter che buna. Neiv e neiv en abundonza mo era cuflau ha ei la sonda e la dumengia, culs retgs ein serendi casa per casa. „ Plaunet vegn ei aunc ualti pretensius, il freid, il cantar e las liungas distanzas. Mo ei va gie per ina buna caussa“, quels plaids ha ina buoba palesau a mi.

La dumengia en baselgia sogn Martin a Platta han ils retgs perfin delectau la raspada serimnada alla messa. Sur Martin Bearth ha engraziau cordialmein als retgs per lur presentaziun ed engaschi en baselgia. La dumengia sera, cu tut ei stau finiu ha il team da scola aunc envidau ad ina tscheina communabla. Quei sco engraziament als affons per lur excellenta lavur. Tier nus organisescha adina la scola ils retgs. Scolasta Evelina Giger ha exercitau duront ils dis libers las canzuns culs affons dalla 4. – 6. classa. Scolast Adrean Hosang e scolasta Catarina Steger han gidau davos las culissas. Per che tut funcziuna bein basegna ei in tschuat buns nanins. Lavur d’idealists. Quei bi usit ei pli e pli en prighel da svanir. Ualticarteivel buca mo enta Medel. Pertgei buca tuts sengaschan gratuitamein ed aunc el temps liber per usits tradiziunals, ils quals enriheschan enorm la cultura da vitg e vischnaunca. La bunamana ch’ei vegnida rimnada vegn repartida a treis instituziuns socialas.