Puspei inaga ha la societad da musica Medel/Lucmagn envidau l’entschatta digl onn ad ina sera famigliara. Quei ei gia daventau usit ils davos onns. Dapertut en vischnaunca sin tabla nera ei gia vegniu encuretg in bien temps avon avon quella sera, candidats cun talents tut specials per la rangaziun dil „Superstar“.

La sonda sera, ils 10 da schaner era la sala da scola a Curaglia fullanada cura ch’il president dalla societad da musica Victor Venzin ha astgau beneventar ina gronda raspada.

All’entschatta han las musicantas ed ils musicants sunau entgins tocs ord lur repertori. Sut la bitgetta da Giohen Monn havein nus saviu seperschuader d’ina fetg buna qualitad da musica ed ei ha fatg gust sin il concert primavaun, che vegn daus ils 14 da mars a Curaglia.

Ils differents sketschs han sluccau ed ein stai medischina pil cor. La part principala ei succedida en fuorma dil casting da „Superstar“ Per quell‘emissiun, che vegn gia emessa dapi in temps sils pli differents emiturs, ei vegniu encuretg ord nossas retschas persunas e gruppas cun talents zuppai ni talents extraordinaris.

Ils treis jurors astgan secapescha era buca muncar. Bruce, il bargelader dalla naziun Tudestga e um cun sentiments plitost da dunnas ei vegnius imitaus da Mario Pally. Silvie, la dunna che porta intec colur en quella giuria, ei vegnida imitada da Iris Monn. E lu il Superstar cun la bucca gronda Dieter Bohlen ei vegnius imitaus da Giohen Monn. Ch’ils candidats, che ston sepresentar avon quella giuria han buca giu gest ina sempla sort secapescha da sessez.

Avon ch’ils candidats ein sepresentai sin tribuna ei aunc vegniu mussau entginas scenas da tals candidats, che han buca giu la cuida da vegnir ina runda vinavon. Ils films dils Superstars ch’ein curdai speras giu, han perfin tuccau il malpuccau dil pievel.

Igl emprem ein duas saltunzas sepresentadas. La Milena e la Marlene han perschuadiu cun in fetg bi e pretensius sault. Suenter ei ina gruppa musicala sepresentada. La Bianca ei vegnida accumpigniada dall’Ursina, dalla Sabrina e dalla Dania. Lur canzun, ch’ei vegnida presentada a nus veramein en registraziun directa, ha perschuadiu tuts presents. Sco davos candidat ei Dario Lutz sepresentaus ed ha presentau a nus in solo cun siu instrument da percussiun.

Suenter ils commentaris e las criticas dalla giuria ei la gruppa da musica cun la Bianca ida cun las arbagias. In cumpliment allas candidatas e candidats per quella buna prestaziun

10 avon las endisch astga secapescha buca muncar ed ei gia daventau ina tradiziun alla sera famigliara. La politica communala culs renomai craps da beinvegni ein vegni tematisai sco era in discuors cun Ueli Maurer, nies niev Cusseglier federal. Ulteriurs schabetgs communals ein era aunc vegni tematisai.