Buania 2020 enta Medel

Ils retgs ein danovamein vegni da Buania a visitar casa per casa. Na, tier nus eis ei stau quella ga empau auter. Mo reginas han visitau igl onn 2020 vitg e val. Per l’emprema ga han ellas cantau ina bellezia canzun en duas vuschs.

Cunquei che la vischnaunca da Medel/Lucmagn posseda gia dapi dus onns negina scola pli ei quella presentaziun dils treis sogns retgs, pia da nossas reginas, stada in schenghetg tut apparti e bi. Ellas eran en siat ed han delectau nossas vischinas e vischins cun lur finas vuschs ed era aviert aschia las buorsas per ina bunamana.

Las giuvnas reginas han fatg tutta honur al bambin. La collecta vegn surdada uonn cumpleinamein alla casa d’affons Urpi Wasi a Peru. La scola da Medel ha gia giu el vargau buns contacts cun quell’instituziun che basegna sustegn finanzial per procurar andantamein per la scolaziun e sustetgn dils affons ch’ein en fetg grondas miserias.

La canzun ei vegnida creada cun maun liber da nossa anteriura scolasta Evelina Giger. Organisau la fiasta da Buania ha la mussadra Petra Pally. Allas giuvnas ch’ein s’engaschadas e che han purtau a vischinas e vischins medelins quei bi usit e quella biala canzun, ellas che van tuttas a Mustér a scola e per part leu el gimnasi, ad ellas auda in zun grond cumpliment ed engraziament. Bravo!

La canzun ha l’Evelina creau sur dil tema d’arver il cor e schenghegiar al concarstgaun en miseria enzatgei. Quei gest perquei che la collecta va per affons en pupira.

La dumengia ein ellas siat sepresentadas en baselgia Sontgaclau a Curaglia e purtau leu ils giavischs pigl onn niev als presents. Cheu il text che las reginas han cantau cun lur finas vuschs:

1. Nus essan ils sabis e viadi fagein.

La glisch splenduronta bugen suandein.

En stalla catein gl’affon zun carin.

Cun stem’e respect salidein il bambin.

2. En gronda pupira ei Jesus naschius.

Per nus tuts spindrar cheu sil mund s’el vegnius.

Aunc oz en nies temps ei dat paupradad.

Perquei appelein a vies spért da buontad.

3. Pudeies uss arver vies cor e vos mauns.

Levgiar la miseria da bia concarstgauns.

Per vus implorein dil car sogn affon.

La benedicziun ed in bien niev onn.

Da seniester sin la fotografia:

Livia Venzin, Ella Flepp, Janna Venzin, Luana Pally, Giulia Flepp, Laura Bundi e Sarina Venzin

Ciprian Giger