"Glisch el tunnel" 404 historias cuortas

Dumengia suentermiezdi, ils 19 da schaner ha sur Martin Bearth giu la vernissascha da siu novissim cudisch e quei en Casa sogn Giusep a Cumpadials. "Glisch el tunnel" ei il secund cudisch che sur Martin ha scret e quei enteifer ils davos treis onns. Siu emprem cudisch "Sin vias e sendas – tras dis ed onns" ei vegnius presentaus entschatta december digl onn 2016. Tal ha giu oreifer success. Aschia ei nies bien sur Martin staus motivaus danovamein e scret in secund cudisch. Quel ei ina cuntinuaziun da si'emprema ovra. Quei astgan ins dir aschia. El ha danovamein scret si historiettas ord ils priedis da ses biars onns en pastoraziun mo era aventuras ch'el ha sez fatg atras. Sut mintga raquent ei aunc in patratg persunal da sur Martin.

Danovamein cun maletgs d'Andrina Derungs

"Mintgin sa e duei far ses agens patratgs cu el legia mintgamai in da quels 404 raquents. Pertgei mintgin da nus ha era en si'atgna veta da caminar tras tunnels stgirs. Mo alla fin da mintga tunnel sclarescha danovamein il clar dil di". Quels plaids ha sur Martin palesau avon la prelecziun d'entginas da sias historiettas. Danovamein ha la giuvna artista da Danis cumplettau il cudisch cun bellezia maletgs. Andrina Derungs ha dau aschia al cudisch ina tut speciala muntada. Sur Martin ha detg sez inaga, che savens sappien maletgs dir pli bia che plaids. Quei constat - las scenas che Andrina ha malegiau ein impressiunontas e da caracter plitost seriusas. Mo ellas van a prau cul cuntegn dil cudisch.

Ils aunghels gidonters

Els dus, sur Giusep Venzin da Pardé e Gabriel Derungs da Danis, ein stai ils buns aunghels davos las culissas. Els dus han luvrau mordio per che sur Martin vegni da stampar novissimamein in cudisch. Cun cureger e crear il layout, organisar il stampat ed era cun encurir sponsurs. Il resultat ei veramein in'ovra ch'ins sto bunamein haver sin mintga meisa da notg.

Sur Giusep ha presentau als presents en baselgia en Casa sogn Giusep il cudisch da sur Martin. El ha fatg quei sco ins enconuscha dad el. En stil sempel e humoristic. L’entira vernissascha ei vegnida embellida dil chor mischedau da Rabius, ensemen cul chor d’affons ad hoc. Els han cantau sut la direcziun da Gabriel Derungs entginas bialas canzuns da Nadal. Ils affons pigns han dau cun lur vuschs finas alla vernissascha in tut special ambient. Quei ei era stau ina surpresa per sur Martin, pertgei el saveva da quei nuot. Il cudisch san ins cumprar directamein tier sur Martin ni en Papeteria Andrea a Mustér.

Ciprian Giger