Sen igl maletg ins vei igl bietg tignia an stil gôtic e tgi serva oz scu tgesa pravenda per igl spiritual da Salouf. Poeschel datescha igl bietg ord igl 18avel tschentaner. An chel bietg on gia dimora tranter oter er igl Pader Alexander Lozza ed sies nev Ser Duri Loza.

Andreia Grisch screiva ainten sia publicaziun «en viadi tras Surses» igl onn 1915, tgi an chest lia era igl curtinagl. en lia noua tgi mintga catter onns, la dumengia siva Son Giera, niva tignia la tschantada. Igl de dalla tschantada era en de da legreia, en de da festa popular, e betg angal votants cun sentimaints ardents da dignitad e libertad, mabagn er rotschs femnas ed unfants plagns marveglias, fulanavan chel de las giassas stretgas digl vigl Salouf. (ro)