Cun en concert da gala cun dus premaudiziuns e cun melodias or dad ovras digls gronds cumponists Beethoven, Mozart, Wagner e Verdi ò igl chor giubilar delecto la sonda digls 9 zarcladour 2007 en grond auditori an sala Grava. "Igl mond digl paster pitschen" da Giovanni Netzer è nia mess an musica da Gion Antoni Derungs e "Mosaic sursetter" da Mario Jegher ò survagnia igl vistgia musical da Gion Giusep Derungs, anteriour dirigent. La part solistica on surpiglia Rilana Cadruvi, alt, Ingrid Schütz, sopran, Christian Cantieni, tenor e Remo Weishaupt, bass. Accumpognamaint agl clavazign Clau Scherrer. La direcziun ò gia igl dirigent Luzius Hassler. Pinavant on collaburo scolaras e scolars dalla terza anfignen la 6avla classa, igl chors masdos unias da Surses, igls chor virils dalla val ed igl Chor viril Alvra. Chels chors unias cun radond 120 vouschs on alla finala delecto igls 700 auditours cun 4 canzungs classicas. Igl concert da giubileum è sto en grondissem success e dat speranza ed anim per igls proxims 100 onns.