La crusch sil Péz Ault
La crusch sil Péz Ault
La natira ei stada pli ferma
Igl atun digl onn 2008 vevan entgins idealists montau ina nova crusch sil spitg dil Péz Ault. Quei Péz sesanfla sin in'altezia da 2470 m.s.m. Ina crusch che la scrinaria Flepp da Mustér haveva construiu en duas parts. Els havevan lu era gest purtau si in niev cudisch per schar inscriver ils viandonts. Purtau siado naven dalla Puzzetta la crusch, las maschinas per fermar ella e secapescha era il betun per fermar ella sil crap. Ina lavur stentusa.
La crusch sfraccada dil cametg
Igl onn 2016 essan nus viandai sil Péz Ault ed essan stai surstai. Ualticarteivel haveva in cametg ed il vent, forsa schizun la neiv destruiu la crusch. Basta la crusch era per tiara ed in ski vegl dall'anteriura crusch sesanflava dasperas. In segn da cardientscha e speronza terraus per tiara. Lein sperar ch'enzatgi anfli puspei l'iniciativa da remplazzar quei bi segn sil Péz Ault.
La nova crusch cun si in tilacametg ed ina scaffa pil cudisch
Ils 31 da fenadur digl onn 2017 ein 5 vischins da Pardé danovamein semess sin via ed han purtau la nova crusch sil Péz Ault.
Dapi quei datum sesanfla ina nova e biala crusch en lenn larisch cun si in tilacametg sisum il cuolm. Ils 5 protagonists han adempliu a fetg bia viandonts in gron giavisch e plascher.
In cordial Dieus paghi persuenter!
Ils 5 idealists da seniester: Patric e Silvan Giger, Paulina e Marius Giger e Werner Giger
Ramona Giger da Pardé, uost 2018
La stad 2018 essan nus viandai sil Péz Ault e la crusch steva leu francada fermamein. In bi maletg sin in fetg bi cuolm cun ina magnifica survesta.
Il cudisch digl onn 2008 era emplenius cun bials commentaris ed in niev cudisch sesanfla puspei leu. Sch'ins sfeglia els cudischs ein buca tuts viandonts incantai da quella crusch.
Ei dat commentaris che valeteschan ina crusch sisum in Péz sco segn falliu per nies esser. Quei disfigureschi schizun la natira. Persunalmein capeschel jeu buca sch'enzatgi va sisum in cuolm e lai disturbar d'in segn da nies cristianissem sco d'ina crusch? Denton ei dat sin quest mund da tuttas sorts nuorsas - neras ed alvas, mo mintgaton era da quellas mischedadas. Lein pia era acceptar ils commentaris ureidis en nies mintgadi.
Ciprian Giger, Pardé, ils 12.02.2019
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.