A las stailas – spersas e lur fastizs
A las stailas – spersas e lur fastizs
Il test da gravidanza è positiv, il plaschair crescha ad in crescher e lura capita il nunspetgà, ina spersa. L’uffant mora avant che nascher. In fatg che capita pli stedi che quai ch’ins quinta. En Svizra han passa 20’000 dunnas ad onn ina spersa. Marisa Graf da S-chanf e Bernadette Arpagaus da Cuira èn duas dad ellas. Ellas han stuì prender cumià dals uffantins, avant ch’ellas han pudì beneventar els.
Il film «a las stailas – spersas e lur fastizs» raquinta da las mammas Marisa e Bernadette. Marisa ha parturì morta lur figlia Melina en la 39avla emna. Bernadette ha gì dus aborts spontans durant las emprimas dudesch emnas.
Las duas dunnas e lur famiglias raquintan dal schabetg, dal mal e da las malgistadads ch’ellas han fatg tras, dentant era da quai che ha purtà consolaziun e speranza.
Schegea ch’i dat numerusas spersas en Svizra, è la societad savens surdumandada e na discurra betg avert surlonder. Las mammas vegnan anc adina tractadas a moda nungista davant la lescha. Quai èn intgins dals motivs, pertge che las mammas pateschan savens sulettas ed a la tgeua.
«A las stailas – spersas e lur fastizs» duai dar a las persunas pertutgadas ina vusch, stgaffir chapientscha ed animar da discutar e da dar plazza a quest tabu en la societad.
Ein Film von RTR Cuntrasts mit deutschen Untertiteln.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.