Curs da cuntschar il favrer 1930 a la Scola da dunnas dal Grischun
Curs da cuntschar il favrer 1930 a la Scola da dunnas dal Grischun
La fotografia mussa pliras dunnas, che lavuran plain concentraziun vid maschinas da cuser da la marca Singer. Sco ch'ins po leger sin la tavla davosvart, sa tracti da participantas d'in "curs da cuntschar" per magistras da lavurs a maun, ch'ha gì lieu il mez da favrer 1930 a Cuira. Qua han ins emprendì sin in livel avanzà, co che rusnas en vestgadira vegnan cuntschadas. Ina dunna da vart sanestra guarda directamain en la camera. Deplorablamain è sia fatscha in pau turbla, po esser ch'ella aveva gist en quest mument auzà ses sguard da la lavur. Malgrà la clerezza imperfetga è la fotografia ina perditga dal temp impurtanta. Ella documentescha la lavur da la Scola da dunnas dal Grischun a Cuira.
La furmaziun da dunnas daventava adina pli impurtanta en il decurs dal 19avel tschientaner. Ina meglra furmaziun per dunnas da las classas socialas pli bassas valeva en circuls burgais sco mesira effizienta cunter la paupradad. En il center steva en emprima lingia l'abilitad da manar in tegnairchasa che pussibilitava ina vita sauna er cun resursas modestas . Sina Wassali, figlia dal president communal e cusseglier guvernativ Friedrich Wassali, ha l'onn 1888 fundà ina "scola da lavur da dunnas" privata a Cuira. Er uniuns da dunnas s'engaschavan, per ch'i vegnia purschì a las dunnas ina furmaziun sco preparaziun per la professiun da chasarina e sco qualificaziun per la vita professiunala. Per iniziativa dad Anna Caviezel e la Societad d'utilitad publica dal chantun Grischun è 1895 suandada la "Bündnerische Koch- und Haushaltungsschule", ch'è 1912 fusiunada cun la scola da lavur da dunnas. Intgins onns pli tard èn vegnidas vitiers partiziuns da seminari per la furmaziun da scolastas da lavurs a maun e d'economia da chasa. Dapi 1918 purtava la scola il num "Scola da dunnas dal Grischun" ed ha gudagnà pli e pli impurtanza. Cun l'acceptaziun da la lescha per promover la furmaziun da las dunnas tras il pievel il mars 1967 è lura il chantun Grischun daventà purtader da la scola da dunnas avant manada sco fundaziun.
La fotografia tutga cun numerusas autras fotografias e documents tar l'inventari da la Scola da dunnas dal Grischun en l'Archiv dal stadi dal chantun Grischun.
Autura: Immacolata Saulle Hippenmeyer, Archiv dal stadi dal Grischun
Staatsarchiv Graubünden / StAGR C54.78 / Handarbeits-Seminaristinnen: Spinnen, weben, kochen und nähen (1930) / Fotograf: unbekannt / CC BY-SA 4.0.
Nossa vita: in tschientenari istorgia svizra en maletgs
Guten Tag
Ja da kommen mir gleich Erinnerungen der Nähkurse hoch und auch wenn ich nichts gegen das Nähen selbst hatte, konnte ich die blöden Mädchenkurse nicht Ausstehen. Vermutlich fand ich das Ganze sehr langweilig und Ungerecht da die Knaben an dieser Stelle Schreinern durften, oder auch mussten. Also hab ich's einfach nicht wirklich Gelernt meines Trotzes wegen. Und Dies trotzdem ich im Hintergrund an einer ernsthaften Schneiderlehre herumgrübelte. Und ja auch die hässlichen Maschinen gefielen mir schon ganz und gar nicht. Schade hatten wir nicht diese wunderschönen Singer welche so richtig anziehend und stabil Aussehen. Gut möglich dass auch ich Darauf so richtig Gas gegeben hätte um die Nicht-Gleichstellung zu möbeln
Mit freundlichen Grüssen
Renata