Nus stains ün pô pü ot sper la chesa da scoula da San Murezzan e guardains sülla plazza da scoula. Ad es la fin da lügl dal 1948. In pochs dis faro l’uffizi da construcziun ed imsüraziun da San Murezzan üna innumbraziun dal trafic, cò ed in oters puncts neuralgics. Las plazzas da parker peran d'esser frequentedas bain: sül purtret sun var 20 autos da persunas e duos camiuns. Sün ulteriuras fotografias da quista seria as po eir identificher singuls numers dals autos. Ün pêr Zürigais, ün Bernais, da Soloturn, ün Appenzellais. E chi saro il possessur dal Cadillac-Series 61 Club Cup dal 1948? Ad es sanda zievamezdi. Inua sun ils uffants? Nu faun els già vacanzas u güdan als purs a fer cun fain? Ün pêr guardan sün la persuna accumpagnanta, duos mats guardan in direcziun dal fotograf chi registrescha la scenaria. A schnestra sper la bacharia B. Robbi as cugnuoscha la chesa cumünela veglia chi vain sbudeda dal 1955.

La plazza da scoula es ün punct centrel da trafic cun tschinch vias d'access. Il di da l’innumbraziun da trafic, ils 7 avuost 1948, vegnan quintos in tuot 2’578 veiculs traunter las 07.00 e las 19.00, sper autos e camiuns eir 680 velos, 65 töfs, 11 charrozzas e duos chavalgiaunts.

La fotografia, da la quela nus nu cugnuschains l’autur, ho ün caracter documentar. Ella nun es insceneda, las persunas nu’s preschaintan. Il sectur dal purtret nun es tschernieu tenor criteris estetics, el dess sustgnair e cumprover la lavur da l’autorited cumünela. La fotografia cun la signatura FR I / gr / 0082 appartegna ad üna collecziun da l'archiv dal stedi dal Grischun da singulas fotografias da differenta derivanza cun motivs grischuns. Ün register as chatta i’l sistem d'infurmaziun da l'archiv dal stedi.

Autura: Graziella Borrelli, Archiv dal stedi dal Grischun

Staatsarchiv Graubünden / StAGR FR I / gr / 0082 St. Moritz, Verkehrszählung (24.07.1948) / Fotograf: unbekannt / CC BY-SA 4.0 / Archivinformationssystem Staatsarchiv Graubünden.