L'archiv da RTR ed il project "nossaistorgia.ch" han visità l'avrigl 2024 la vischnanchetta da Tschlin en Engiadina Bassa. L'occurenza (sin la foto il curatur da nossaistorgia.ch Flavio Huonder ) è vegnida visitada da radund 120 persunas.

Il rapport en La Quotidiana:

Üna sala polivalenta a Tschlin bain occupada ha salüdà a Radiotelevisiun Svizra rumantscha (RTR) cun lur sporta da l’archiv in viadi. Il moderatur Armon Schlegel ha bivgnantà la brajada: «Cordial bainvgnü a nossa sporta nouva dad RTR cun segns dal temp, vossas e nossas memorias. S-chazis e perlas our da noss archivs, istorgias, persunas our da vos cumün e da vossas fracziuns.

Per cumanzar faina ün sigl ill’aua fraida cun ün dals documaints ils plü vegls cha no vain chattà chi datescha dal 1967.» Il film ha muossà ün accidaint a Strada pro üna punt devastada ingio cha duos autos sun rivats i’l En. L’accidaint ha chaschunà quella jada duos morts, ed il film ha muossa il salvamaint dal veiculs.

Tanteraint ha eir il directur dad RTR, Nicolas Pernet, oriund da Sent salüdà ils preschaints: «Eu n'ha fich grond plaschair da das-chair esser hoz qua a Tschlin in occasiun da quista sairada da films ün pa plü vegls, ch'ins mainan inavo üna cuorta pezzina i’ls temps passats. Ün muond chi sdruaglia algordanzas da la regiun Engiadina Bassa e dà ün sguard inavo. Minchatant as staja be stut co cha bleras chosas sun amo

in buna algordanza.»

Trategnimaint e gös

RTR ha lura muossà diversas sequenzas cuortas da trais differentas emischiuns da trais different decennis, dal 1974, 1984, 1994. Las testas finas, Piz a cup e Daidai-dai, culs moderatuors fich cuntschaints Ernst Denoth, René Spescha e Burtel M. Bezzola. Ed eir il Balcun tort chi ha gnü grond success es gnü manzunà manüdamaing.

Tanteraint ha Flavio Huonder dad RTR declerà co chi’s po chargiar giò documaints chi’s ha per part vis dürant la saira; fotografias, films e bler oter plü da l’archiv dad RTR sülla pagina d’internet nossaistorgia.ch.

Sco cha’l moderatur ha dit es quist archiv qua per dar ün sguard inavo, ed ün sguard inavo es eir bun per incleger il preschaint: «Schi’s fa quai schi’s poja eir ris-char da verer i’l avegnir e far prognosas.»

Tanteraint haja adüna eir darcheu dat discuors, per exaimpel da Jachen Prevost cun Jon Duri Tratschin, president da l’Archiv Cultural d’Engiadina Bassa. El ha declerà co chi s’ha decis da fundar l’archiv e che böts chi s’ha: «Daspö cha l’archiv exista s’haja fat ün pa reclama, organisà sairadas d’infuormaziun cun referats e la pressa ha adüna darcheu rapportà davart noss intents», ha declerà Jon Duri Tratschin.

Sguards inavo

Ils preschaints han evis ün film davart la bacharia da chasa ingio cha’l bacher gniva a chasa per mazzar las bes-chas ed eir co cha quai gniva fat. Eir ils prodots da charn da la bacharia sun gnüts examinats e preschantats in quella sequenza da film.

Jachen Prevost ha eir discurrü cun Jachen Erni, il president dal Center cultural Baselgia San Niclà. «Schi’s discuorra dad Erni da Tschlin schi es ün tema musica», cun quella frasa ha salüdà il moderatur aJachen Erni. Quel ha quintà davart da la musica, ma impustüt eir da la baselgia San Niclà. El ha lura declerà l’istorgia chi va inavo fin pro la fabrica da la baselgia romana i’l 12avel tschientiner. «La via principala manaiva da Ramosch sur Raschvella a San Niclà, traversaiva l’En, e manaiva sur Chaflur vers Martina. Dal 1982 vaina miss in pè la fundaziun cul böt da refar e mantgnair la baselgia. No vain ramassà munaida, adattà e renovà la baselgia in möd cha no pudain hoz preschantar arrandschamaints da tuot gener.» (Text: Benedict Stecher)