Peterli ha furtüna. El riva da s-champar be per pacas dals duos corvs e’s po zoppar davo ün grip. Ma qua vezza'l a gnir ün hom! Il cour da Peterli batta ferm da la temma. Cuorrer davent! El nu po. Peterli es sco schirà. E fingià es el i'ls gronds mans da l'hom. «Uossa es tuot a fin!», pensa'l. Pero i vain oter.

Pro l'hom as trattaiva dal fotograf Domenic Feuerstein (1900-1949). El ha tut a chasa la giuvna muntanella ferida, ingio cha tuot la famiglia, il giat pitschen e’l daccal Lumpi s'han occupats cun amur dal paziaint. Ils Feuersteins han dat a la muntanella il nom Peterli. Cur cha Peterli d'eira darcheu sana, tilla ha Domenic manà inavo in seis contuorn natüral ot sur Scuol. Per el es statta quell'episoda il cumanzamaint per numerusas registraziuns da bes-chas ed eir inspiraziun per ün cudesch d'uffants e per ün film.

Quai es capità ils ons 1930. Hoz nun es la chüra da bes-chas sulvadias plü permissa. Bes-chas amaladas o blessadas ston gnir annunziadas immediatamaing a la guardgia da chatscha.

Il bap da Domenic vaiva fundà cuort avant l'on 1900 la butia Foto Feuerstein chi ha existi sur quatter generaziuns e dürant passa tschient ons a Scuol. Per mantgnair l'inventar fotografic da l'affar han ils descendents fundà dal 2012 la Fundaziun «Fundaziun fotografia Feuerstein». Quella ha surdat al büro da fotografia da Berna l'elavuraziun archivara dals passa 50'000 purtrets. Ils originals vegnan conservats i’l Archiv dal stadi, digitalisats stan a disposiziun online sün las paginas d'internet dal büro da fotografia da Berna e dal Archiv dal stadi.

E dal rest: il cudesch «Peterli. Istorgia d'üna muntanella» ed il film «Peterli» as rechattan illa Biblioteca chantunala dal Grischun.

Autura: Brigitte Aregger, Archiv dal stadi dal Grischun

Staatsarchiv Graubünden / StAGR N1.KA-1620-NEN Murmeltier (Peterli) und Hund (Lumpi) in Türrahmen (ca. 1935) / Fotograf: Domenic Feuerstein (1900-1949), Scuol / Archivinformationssystem Staatsarchiv Graubünden.