Cun l'entrada en vigur da la constituziun da mediaziun dals 19 da favrer 1803 che Napoleun Bonaparte ha decretà, è naschì il chantun Grischun. L'innovaziun decisiva da questa constituziun è stada l'installaziun da dus novs organs: il Cussegl grond ed il Cussegl pitschen. Els han permess per l'emprima giada d'administrar e guvernar il pajais da maniera uniforma. Al Cussegl grond che sa cumpona da 63 deputadas e deputads da las vischnancas giudizialas èn vegnidas surdadas la legislaziun ed il mantegniment da la pussanza dal pajais, entant ch'il Cussegl pitschen è stà l'emprima executiva da l'entir Grischun.

Ils 3 da matg 1803 ha il Cussegl grond engrazià a Napoleun per sia mediaziun ed exprimì sia satisfacziun davart la fin dals cumbats prerrevoluziunars da las partidas e la fin dal centralissem da la Republica Helvetica. Ils 27 da zercladur 1803 ha Napoleun respundì en num dal pievel franzos cun la brev presentada qua: "Citoyens Chef et membres du Grand Conseil du Canton des Grisons". Il text per rumantsch sa cloma: "Las discordias da Voss pajais hai jau deplorà fitg. Jau sun fitg cuntent d'udir cun scriver dals 3 da matg ch'ellas hajan fatg plaz a l'uniun la pli seriusa e ventiraivla. Las spetgas che m'han manà a m'occupar da Voss interess èn pia ademplidas."

Staatsarchiv Graubünden / StAGR A I/2a Nr. 184/1 / Archivinformationssystem Staatsarchiv Graubünden.