Nus vesein ina fotografia da famiglia minuziusamein inscenada ch'ei probablamein vegnida prida si avon il dacasa dalla famiglia en Surselva. El center stattan ils geniturs circumdai da lur affons. La mumma tegn il pli giuven commember dalla famiglia sin bratsch, il bab pusescha siu maun silla schuiala d'in fegl. Ils pignets dattan ad in l'auter il maun ell'emprema retscha. La famiglia sepresenta sil maletg sco ferma unitad. Plein tensiun vegn mirau ella camera. Attenziun ed egls aviarts! Duront il fotografar vegn il fotograf a ver dau las instrucziuns corrispundentas. Da gliez temps era fotografar numnadamein in eveniment extraordinari e buca banal. Ei vegneva fotografau cun plattas da veider quei ch'era ualti stentus ed il temps d'exposiziun alla glisch era relativamein liungs. La producziun dalla fotografia da famiglia era ina caussa seriusa ed in surrir era evidentamein buca giavischaus. Per quella opportunitad eri da prender neunavon il resti da dumengias. Il bab ed ils fegls pli vegls portan cravatta. Sin fundament dalla vestgadira selai il maletg circa datar. El sto esser vegnius prius si denter 1920 e 1930.

La famiglia veva 10 affons, quei che era da gliez temps duront ina lètg nuot extraordinari. La mortalitad dils affons era denton relativamein aulta e buca darar murevan las dunnas duront parturir.

La fotografia deriva ord il relasch fotografic dad Ildefons Decurtins (1901–1964) da Mustér che vegn conservaus egl archiv dil stadi e che porta la signatura FN XXVII/920. Il relasch da Decurtins cuntegn surtut portrets da persunas ord la Cadi. Tochen uss han las persunas sil maletg deplorablamein buc saviu vegnir identificadas. Tuttas informaziuns ed indicaziuns surdlunder ein beinvegnidas (info@sag.gr.ch).

Autura: Sandra Nay, Archiv dil stadi dil Grischun

Staatsarchiv Graubünden / StAGR FN XXVII / 0920 N.N., Eltern mit ihren Kindern, vor Haus, Familienfoto (1920 - 1940) / Fotograf: Ildefons Decurtins, Disentis/Mustér (Fotograf) / CC BY-SA 4.0 / Archivinformationssystem Staatsarchiv Graubünden