Pel fotograf fan ils homens chi han üna düra lavur üna cuorta posta. Equipats cun palas, zappuns e charrettas rumischan els la grava. Cur ch'üna greiva bouda ha toc als 21 d'avuost 1911 il cumün da Fuldera (Val Müstair), güdan abitants e sudats a rumir la grava chi’d es restada. Il privel da boudas exista fingià lönch a Fuldera. Il lexicon geografic da la Svizra cumparü l'on 1902 manzuna suot il chavazzin «Fuldera» explicitamaing ils privels respectivs. I's ha provà fingià bod da frenar la forza destructiva da lavinas da belma e boudas. La charta da Siegfried dal 1870 muossa per la Val Ruina a Fuldera repars da protecziun illa val. Ils 21 d'avuost 1911 haja però listess dat ün accidaint. Davo üna stà sütta ed ün temporal nun han pudü frenar ils repars la crappa chi’d es gnüda giò. Our la Val Ruina e da la Val Fossa sun gnüdas boudas lung ils torrents sulvadis, han sepuli la via a Fuldera da tuottas duos varts ed han isolà il cumün dal muond exteriur.

L’indschegner e fotograf paschiunà Gian Battista Gross es stat al lö per documentar las lavurs da rumida in üna seria da purtrets. Ses relasch fotografic – ün grond effectiv da var 1900 plattas da vaider negativas – vain conservà i'l archiv da stadi dal Grischun. Ils purtrets sun digitalisats ed accessibels aint il sistem d'infuormaziun da l'archiv dal stadi. Il purtret muossà porta la signatura StAGR N2.1779.

Autur: Martin Heeb, Archiv dal stadi dal Grischun

Staatsarchiv Graubünden / StAGR N2.1779 Gruppenporträt: Soldaten und Zivilisten bei Aufräumearbeiten nach der Rüfe 1911, Val Müstair (1911) / Fotograf: Gian Battista Gross (1883-1961), Tschierv / CC BY-SA 4.0 / Archivinformationssystem Staatsarchiv Graubünden.