Vista sin Cuira giu dal Calanda
Vista sin Cuira giu dal Calanda
Maletgs e fotografias da cuntradas rendan vesaivlas istorgia e e svilup dals abitadis – uschia er quella fotografia. Ella è vegnida fatga sin il Calanda, ina da las muntognas da chasa da Cuira, e mussa la chapitala dal chantun Grischun l'onn 1934. Ins guarda giu sin ina citadina alpina cun caracter champester, en la quala vivevan en quel mument var 15'500 persunas. Muntognas cuvertas cun guaud enrameschan la citad: da maun dretg il Pizokel, da maun sanester il Mittenberg ed el sid dominescha il Gürgaletsch.
Tras la cumposiziun dal maletg vegn l'egliada contemplonta guidada cun intenziun. Las diagonalas dal maletg sco med da creaziun fotografic, qua marcadas tras las costas dals culms, èn bain vesaivlas. Tranter las duas plantas davantvart maina la via dal Rain (cun in pau in auter trassé che oz) en la citad veglia istorica ed el center dal maletg. Sch'ins guarda exact èn d'enconuscher bajetgs singuls, per exempel il clutger da la baselgia da Son Martin.
Il sguard istoric mussa il svilup dals quartiers. Sco ch'ins po vesair en il terz sut da la fotografia, dominavan 1934 anc prada ed ers la cuntrada en la part dal nord da la citad e fan chapir danunder ch'ils nums da quartier Wiesental e Tittwiesen derivan. La Ringstrasse era ina via da quartier curta e betg anc amplifitgada ad ina'axa da traffic principala, e la via da sviament sco part da la via naziunala N13 (oz A13) è pir vegnida stgaffida 1965 e manca per consequenza sin la fotografia. Il quartier dal Rain era pir en svilup. L'extensiun rasanta è alura succedida suenter 1950, activada da la prosperitad economica suenter la Segunda Guerra mundiala.
La fotografia deriva dal affar da fotografias e chasa editura da cartas postalas da tradiziun Gross, fundà 1921 a Son Gagl. Il negativ en nair ed alv represchentà qua (invers sco positiv) è vegnì retuschà e duvrà per la producziun da cartas postalas. Questa fotografia è accessibla en l'archiv dal stadi dal chantun Grischun, sco il rest dals motivs da cartas postalas grischuns da Gross. En il sistem d'infurmaziun d'archiv èn els accessibels online.
Autura: Nicoletta Gschwend, Archiv dal stadi dal Grischun
Staatsarchiv Graubünden / StAGR N3.289 Chur, Blick auf Chur vom Calanda aus (1934) / Fotograf: Foto Gross, St. Gallen / CC BY-SA 4.0 / Archivinformationssystem Staatsarchiv Graubünden.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.