Il politicher catolic-conservativ e giurist Johann Bossi (1874-1956) era da 1915 fin 1920 commember da la regenza dal chantun Grischun. Durant in temp diffcultus (prima guerra mundiala, chauma generala, grippa spagnola!) ha el manà il departament da finanzas e militar. Sco regal da cumià al han ses collavuraturs regalà questa tavla commemorativa. Purtrets da gruppa da questa sort eran er populars tar uniuns ed affars e pendan fin oz en inqual stiva. Sco ch'ins vesa lavuravan 1920 en l'etascha dals schefs dal departament exclusivamain umens, ed exclusivamain "umens cun schnuz". Els guardan en la camera cun autoritad e dignitad. E sch'els surrin, lura be fitg decent. Ina chamischa alva è obligatorica per la chaschun da la fotografia, ma pitschnas variaziuns èn lubidas. En la moda perda durant quest temp il culier terren envers il culier dubel. Bindels da culier, tschittas e cravattas èn preschentas en differentas furmas.

Co ins produciva ina tala fotografia? L'emprim vegnivan fatgs ils purtrets singuls. Alura ins tatgava copias da quels sin in fegl cun dissegns decorativs ed inscripziuns. Suenter vegniva l’entira chaussa anc ina giada fotografada. Il negativ da questa fotografia cumpletta – ina platta da vaider en la grondezza da 30x40cm – è qua preschentada (inversa en il positiv). Da quai vegnivan alura fatg copias e quellas tratgas sin chartun.

Il noss maletg deriva dad in dals inventaris fotografics ils pli impurtants da l'archiv dal stadi dal chantun Grischun, quel dal atelier da fotografias Lienhard & Salzborn cun radund 3000 fotografias. L'inventari è accessibel online.

Autur: Reto Weiss, Archiv dal stadi dal Grischun

Staatsarchiv Graubünden / StAGR FN IV 30/40 P 006 P Kantonale Beamte (ca. 1919 - ca. 1930) / Fotograf: Lienhard & Salzborn, Chur/St. Moritz / Archivinformationssystem Staatsarchiv Graubünden.