Ina tscherta luschezza ins pari da vesair en il portament da l'um, che stat qua davant il local da la stamparia Manatschal, Ebner & Cie. A. G. a la Via da la posta 9 a Cuira. I vegn bain a sa tractar dad in dals associads da l'affar. Sur el fa parada en grondas letras la scrittira da la stamparia da tradiziun da Cuira. Flancada da tuttas duas varts dad indicaziuns da ses magazins ils pli impurtants. Per l'ina la gasetta quotidiana "Freier Rätier", ch'era vegnida surpigliada 1892 cun la cumpra da la stamparia Gengel. Il num oriund "Der Freie Rhätier" è curt suenter vegnì midà en "Der Freie Rätier" (senza h). Da l'autra vart il "Allgemeines Fremdenblatt", ch'aveva num cun num cumplain "Graubünden – allgemeines Fremdenblatt für sämtliche Kurorte" e che cumpareva be d'enviern. Il commerzi d'inserats lucrativ, exequì tras il biro d'inserats dad Orell Füssli, vegn perfin inditgà duas giadas. Sin la porta d'entrada ed a sanestra da la vaidrina sin ina gronda tavla. Qua sa chatta er ina indicaziun sin la "Engadiner Post", che vegniva stampada en la filiala activa temporarmain a San Murezzan. In pau nunspetgà po esser la rauba exposta en la vaidrina da la stamparia. Enstagl da products agens vegnan mussads tavlas da marmel e da serpentin da Poschiavo, cun l'avis sin ina "nova industria grischuna". Sco agid per la dataziun èn las tavlas però bain adattadas, pertge a Poschiavo è pir vegnì explotà marmel e serpentin dapi 1933, uschè che la fotografia sto esser vegnida fatga enturn quel temp.

La fotografia deriva dal relasch fotografic da Lienhard & Salzborn e sa chatta en l'archiv dal stadi dal chantun Grischun. Las radund 3000 fotografias èn digitalisadas e pon vegnir consultadas en il sistem d'infurmaziun da l'archiv. La fotografia mussada è da chattar sut la signatura FN IV 13/18 C 270.

Staatsarchiv Graubünden / StAGR FN IV 13/18 C 270 / Chur, Manatschal/Ebner, Rätier (1889 - 1919) / Fotograf: Lienhard & Salzborn (1889-1963), Chur/St. Moritz.