Per commemorar 500 onns ghera dalla Tgalavagna cugl manader Banadetg Fontana ò igl cirquit Surses previa diversas activitads durant la stad 1999. Er noss chor è dalla parteida cun igls gis festivs dalla Tgalavagna digl cumponist engiadines Otto Barblan, en'ovra tgi era neida scretga per igl giubileum da 400 onns. La cumposiziun è scretga per chor viril, per chor d'unfants, per chor masdo e solists e vign accumpagneda digl orchester "Glarner Musikkollegium". L'ovra è neida manada se dus gedas an sala Grava igl avregl 1999. Digl amprem concert ò Radio Rumantsch registro live e produtgia 1000 CD's tgi on catto bunga accoglientscha e tignan an memorgia chella gronda prestaziun.

or dalla cronica digl chor