Ils pastiziers grischuns, che bandunavan pli baud la patria per gudagnar lur paun en l'ester, èn bain enconuschents. Blers Grischuns han però er gì tut autras occupaziuns en l'ester. In dad els era il geolog oriund da Cuira Moritz Blumenthal (1886-1967). El era activ en l'entir mund, l'emprim en servetsch da la Royal Dutch/Shell a la tschertga dad petroli en l'Indonesia ed en las Filippinas. Pli tard ha el explorà la Cordigliera Betica en la Spagna dal Sid ed il Maroc, avant ch'il ses davos segiurn l'ha manà en Tirchia.

Sias destinaziuns ha Blumenthal adina documentà fotograficamain. Sper furmaziuns da crap aveva el er in egl per pajais ed avdants, sco che la fotografia preschenta mussa. Il bajetg davosvart po vegnir identifitgà sco la moschea Sidi-Bouabid a Tanger (Maroc), grazia al minaret marcant. La gronda plazza cun fiera davantvart è il Grand Socco, uffizialmain Place du 9 Avril 1947, intersecziun tranter citad nova e medina. Anc oz batta qua il cor da Tanger. Animadamain vegnivi martgadà qua, cura che Moritz Blumenthal sa chattava sin la fiera ils onns 1920 tardivs. Uschè animadamain, ch'ins na po betg identifitgar la martganzia tranter las bleras visitadras e visitaders.

Perquai ch'il relasch fotografic da Moritz Blumenthal ha chattà la via en l'Archiv dal stadi dal chantun Grischun, èn là ussa da chattar fotografias da lunsch sur ils cunfins dil Grischun or. L'inventari fotografic Moritz Blumenthal è vegnì digitalisà da l'Archiv dal stadi ed è da chattar online en il sistem d'infurmaziun d'archiv.

Autur: Sandro Decurtins, Archiv dal stadi dal Grischun

Staatsarchiv Graubünden / StAGR FN IX / 1.100 Marokko: Tanger - Tétouan - Al Hoceïma - Tanger (1926) / Fotograf: Moritz Blumenthal (1886-1967) / Archivinformationssystem Staatsarchiv Graubünden.