Sül purtret as vezza duos duonnas düraunt üna cuorsa da Skijöring sül Lej da San Murezzan, probabelmaing traunter ils ans 1920 e 1930. Tal Skijöring vegnan ils atlets, u in quist cas atletas sün skis, trattas dad ün chavagl sur la pista da cuorsa. L'ir cun skis davous ün chavagl d'eira bain lönch cuntschaint scu «Snörekjöring», ma scu sport da concurrenza cul nom Ski-Jöring e’l gnieu invento da nouv a San Murezzan. Dal 1906 es gnida organiseda la prüma cuorsa sün la via traunter San Murezzan e Champfèr. La prüma cuorsa da Skikjöring sül lej da San Murezzan dschiet es steda l'an 1907. In quista fuorma es que gnieu ad üna lungia tradiziun chi fascinescha ils aspectatuors e las aspectaturas eir auncha hoz tal White Turf.

Cha’s vezza sülla fotografia duos duonnas, que es però insolit. Decennis a la lungia valaiva il sport scu domena masculina, perche ch'el pretenda fisicamaing bger dals curriduors: mner ün chavagl in möd sgür cun sveltezzas da fin 50 km, ed intaunt cha naiv e glatsch vegnan incunter drouva que bgera forza, e na da schmancher il prievel d’accidaints. E listess manzuna già dal 1913 Nicolaus Guidon üna cuorsa, inua cha «walküras in vstieus da sport il pü sgiaglios e picants s’inscuntran süls skis per üna concurrenza plain schlauntsch». E zieva decennis da dominanza dals homens sun hoz las duonnas davauntvart tal Skikjöring. Valeria Schiergen ho guadagno quist an per la terza vouta il skijöring al White Turf scu «regina da l'Engiadina» – dal tuottafat i’l senn da las «walküras da skis» da pü bod.

Il purtret chi vain musso cò es gnieu fotografo dad Othmar Rutz ed es üna part d'ün inventar fotografic da la Viafier retica. Las passa 5000 cartas fotograficas cun motivs multifaris our da las muntagnas grischunas sun gnidas druvedas uriundamaing dal «servezzan publicistic» da la VR per intents da marketing. L’an 2008 sun las fotografias gnidas surdedas al archiv chantunel scu donaziun.

Autura: Cinzia Caspar, Archiv dal stedi dal Grischun

Staatsarchiv Graubünden / StAGR FR XXXIX / 1626 St. Moritz/Oberengadin, zwei Frauen beim Skikjöring auf dem St. Moritzersee (ca. 1930) / Fotograf: Othmar Rutz (1879-1961), St. Moritz / CC BY-SA 4.0 / Archivinformationssystem Staatsarchiv Graubünden.