Tradiziun brittanica immez l’Engiadin’Ota: ün picnic a Segl, ca. 1960
Tradiziun brittanica immez l’Engiadin’Ota: ün picnic a Segl, ca. 1960
La fotografia es gnida fatta intuorn il 1960 a Segl Baselgia e muossa üna scena chi documentescha iconicamaing taunt il scharm estiv da l'Engiadina scu eir la colliaziun amicabla da las Britas e dals Brits vers la regiun. La persuna chi fotografescha, da la quela l’identited nun es displaschaivelmaing cuntschainta, stu esser steda inchanteda cun fer quist purtret idillic a l'ur da la via d'Engiadina. Ün pêr britannic s'ho installo là a moda cumadaivla e silenziusa e gioda ün grand picnic cun vista sün la part pitturesca da Segl Baselgia. El vain marko da möd considerabel da la baselgia modesta da San Lurench. La vista our da direcziun nordost sün la baselgia cul majestus Piz da la Margna davousvart saro familier per bgers visitaduors e visitaduras da l'Engiadina. Pel solit nu’s vezza la via aint il center tar telas registraziuns, però cò giouva ella üna rolla decisiva, precis scu il Morris Mini Mk1, immatriculo in Granda Bretagna. A maun dal numer da l’auto e’l paracuolp as po constater cha’l veicul datescha dal cumanzamaint dals ans 1960. D’ün'analisa tecnica dal purtret resulta cha la carossaria dal Mini d’eira in ün tun blov cler, da quel temp numno «clipper blue», intaunt cha'l tet stu esser sto blov s-chür u nair. Il badge monto immez il sfradeder cun l'inscripziun «AAA» indichescha cha'l possessur saja sto commember da la «British Automobile Association». Il purtret anticipescha per uschè dir ün'occurrenza chi vain fatta daspö il 1994 e chi ho lö quist an per la 30avla vouta: il British Classic Car Meeting San Murezzan. Düraunt quatter dis, dals 4 fin ils 7 lügl, vegnan celebros eir quist an oldtimers britannics e la moda da viver inglaisa cun sia relaziun multifaria cun l’Engiadina.
La copcha originela es scritta sün chartun ed archiveda i’l archiv dal stedi. La descripziun detaglieda dal mini simpatic sül purtret es be steda pussibla cul sustegn gentil da Vic Jacob, ün excellent cugnuscheder da la cultura d'autos britannics.
Autur: Patrick Blarer, Archiv dal stedi dal Grischun
Staatsarchiv Graubünden / StAGR FR I / gr / 0182 Sils-Baselgia, Kirche und Umgebung, Picknick neben Strasse und Auto (ca. 1960) / Fotograf: unbekannt / CC BY-SA 4.0 / Archivinformationssystem Staatsarchiv Graubünden.
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.