Ils geniturs Tiuters cun nov dils 14 affons survivents. Da seniester a dretg, davostier: Gion Antoni, Onna Maria, Rosa Martina, Barla, Maria Margreta; enamiez: Flurin; davontier: Genoveva, Luis, mumma Rosa Martina, Florentin, bab Gion Antoni.

La famiglia da Gion Antoni Monn (1849-1912) e sia dunna Rosa Martina Monn (1855-1920) habitavan vi Surrein/Tujetsch egl uclaun da Foppas, la part sura da Surrein. Dils Tuatschins ein els vegni numnai ils Tiuters, els, e ses affons. Danunder quei plitost fasierli num ni surnum? Carteivel entras in sbagl da tschintschar derasaus en famiglia, auter eis el buca da declarar.

Schotg affons ha la Rosa Martina parturiu a Surrein ed in schizun el mises da Pardatsch en Val Nalps. Quater affons ein morts da baret ni sco affonets, dus buobs e las duas schumellinas. Il vegl ei naschius anno 1876 ed il benjamin igl onn 1902. Cun 21 onn ha la Rosa Martina parturiu igl emprem e cun 47 onns il davos affon. Ton eis ei da capir ch'ils affons han mintgin giu in special destin da lur veta e buca tuts han anflau in avegnir ella patria. Aschia ein sis affons emigrai ell'America:

Giusep Antoni Monn, emigraus 1906

Vigeli Giusep Monn, emigraus 1907

Maria Margreta Monn, emigrada 1909

Aluis Monn emigraus, 1920

Florentin Monn, emigraus 1920

Sep Flurin Monn, emigraus 1923

In ei emigraus en Frontscha ed in en Tiaratudestga. In auter ei secasaus giu la Bassa. Duas dallas feglias han bandunau la val e duas ein maridadas en Tujetsch. In sulet fegl ei restaus en Tujetsch, il Gion Antoni ch'ha giu dus fegls.