Catalog dil luvratori da devoziunalias J.J. Deplaz

Il possessur dil luvratori ei Gion Giusep (1854-1925). Siu bab ei emigraus en Baviera/Regensburg e leu eis el naschius. Gion Giusep fuvi in engaschau e tut special talentau um da fatschenta. Sco um giuven eis el serendius da Regensburg a Paris. Leu ha el fatg il mistregn da fravi d'aur. A Nossadunnaun, tier la firma Benziger, ha el fatg la scolaziun sil sectur da contabilitad. Returnaus a Regensburg ha el entschiet cun ina fatschenta da paramenta en casa dalla mumma.

Suenter entgins onns cumpra el la casa pervenda sil plaz dil dom. El aulza il baghetg per ina alzada ed endrezza ina fravia d'aur, ina cusunzaria ed ina fatschenta da surcuser. La fatschenta da devoziunalias e d'art ecclesiastic obtegn buca mo in renum en l'atgna tiara, mobein era suls cunfins ora. Aschia possedeva era la claustra da Mustér biala paramenta ord la fatschenta dil Deplaz a Regensburg. La furniziun da seida, retratga ord Frontscha, pren ina finiziun el decuors dall'Emprema uiara mundiala. Quei sforza da serrar la fatschenta da paramenta e da bandieras.

Dasperas s'interessescha el per la producziun da tievlas. Sco entschatta da quella nova sparta da lavur, cumpra el igl onn 1907 d'in pur a Hagelstadt sper Regensburg ina fabrica manuala da quadrels. Leu engascha el la stad Talians che exequeschan la lavur e quei entochen che la fabrica ei vegnida engrondida ed endrizzada cun maschinas, igl onn 1912. Semegliont ei succediu cun in'autra fabrica manuala da tievlas, cumprada d'in marcadont da cotgla da Regensburg.

Ord il catalog:

Il luvratori a Regensburg sil plaz dil dom.