In emprem beinvegni a Mustér fageva pli baul il "Restaurant zur Brücke" cu ins vegneva ord la Val Medel e traversava la pintga punt sur il Rein per entrar el vitg. L'ustria Langini, sco ella vegneva numnada dils indigens (pronunziau a Mustér Langhini), ei da veser cheu su silla foto giudem seniester. Dretg la fracziun da Raveras, pli davos il vitg culla staziun e la venerabla claustra.

Seniester dall'ustrietta Langini nua ch'ils umens fagevan politica locala duront fimar toscanas e brissagas sesanflava ina pintga stizun. Sur decennis ei la casa vegnida menada da l'ustiera Maria Langini (1919-2016). Sa cons quintins ch'ella ha derschiu o en quei liung temps a ses hosps?

Avon paucs onns ha il "Restaurant zur Brücke" stuiu far plaz ad ina surbaghegiada cul num "Casa Langini". Ha zatgi da Vus che legia quei aunc regurdientschas dil "Langini"? Fagei paleis quellas cheu sut els commentaris.

Cheu sut aunc zacontas fotografias nua ch'ins vesa l'anteriura casa Langini. Sill'emprema ves'ins bein la terrassa davos o.

Il "Langini" pli baul aunc cun fatschada da lenn e senza terrassa.

La Maria Langini sin esch dall'ustria vida contemplar ils umens ch'ein vida bardigliar:

Las davosas fotografias avon ch'il "Restaurant zur Brücke" ei vegnius spazzaus:

Andutgel Lozza cul "Langini"

Gia dapi onns fa la mazlaria Lozza da Mustér reclama per siu enconuschent Andutgel cun ina etichetta nua ch'ins vesa la punt e l'ustria Langini cun davostier la claustra. Sco il mazler Pepi Lozza (senior) ha tradiu a mi seigi l'etichetta naschida da sias uras tenor ina idea da Leo Maissen.

Tiella historia dalla ustria Langini scriva Hans Huonder ils suandont en La Quotidiana 2012:

Sin la parcella nua che la surbaghegiada nova ei construida sesanflava dapi rodund 130 onns ina casa ch'era vegnida transportada en elements giu da Cunel e reconstruida leu. A Cunel era quei baghetg en possess d'ina famiglia Huonder. Da Cunel derivavan era ils geniturs da Cecelia Wenzin, ils possessurs dalla casa, che ha giu maridau Andrea Langini. Sco quei che Ugo e Claudio Deflorin, descendents da quella famiglia, relatan, ei la casa per part ord lenn (tip Gottard) vegnida cumpletada pliras gadas cun ulteriuras annexas. Ella ei denton era vegnida mirada en per part entras Andrea Langini. Andrea Langini, oriunds da Schianno ell'Italia, ei vegnius entuorn 1903 sco giuvenot a Mustér ed ha luvrau cheu sco miradur, per part era en survetsch dalla claustra. Suenter la maridaglia cun Cecelia Wenzin e la cumpletaziun dalla casa ei vegniu endrizzau cheu ina stizun da textilias, mo era devoziunalias. En in'autra stanza encunter la via sesanflava l'ustria numnada «Restaurant zur Brücke». Cheu s'entupavan vischins da Raveras e Gonda, mo era dil vitg ad in quintin vin talian. L'ustria «Langini», sco quei ch'ella vegneva numnada generalmein, era denton era il liug dil davos paus dils viandonts enviers la Val Medel. Andrea Langini vendeva denton era specialitads da sia patria, sco per exempel salami, mortadella, sardinas, ieli d'oliva ni era vinars. Cecelia ed Andrea Langini han giu sis feglias (Anna, Luisa, Adelina, Maria, Giuseppina e Felicia). La feglia Maria Langini ha surpriu stizun ed ustria suenter la mort dils geniturs ils onns 1966/67. La stizun ha ella menau entochen 1975, l'ustria entochen 1998.