La fotografia da l'onn 1955 mussa la Via da la posta a Cuira cun il "Altes Gebäu" en il center. Da vesair è in aspect da la via tipic per ils onns 1950 da la Via da la posta lura betg anc midada en ina zona da peduns. Models iconics dad automobils dal suenterguerra domineschan il parc da vehichels mussà, tranter auter l'Opel Kapitän ed il VW Käfer legendar.

En il center da la fotografia stat l'uschenumnà "Altes Gebäu", oz la residenza da la Dretgira chantunala dal chantun Grischun. Auter che ozendi era il bajetg signuril l'onn 1955 anc enramà dretg e sanester da la fatschada dad auters bajetgs demolids en il fratemp. A la dretga ha quai en spezial dà spazi a la funtauna "Tränen der Lukrezia" da Christoph Haerle, che sa referescha ad in eveniment istoric: Ils 24 da schaner 1639 è Gieri Genatsch vegnì assassinà en l'ustaria "Zum staubigen Hüatli", che steva da lez temp el lieu dal "Altes Gebäu".

Il "Altes Gebäu" è vegnì construì 1727-1731 da Peter von Salis-Soglio (1675-1749) sco palaz da citad. Von Salis-Soglio era da lez temp in dals pli ritgs aristocrats grischuns. Correspundentamain magnific ha il maister constructur turitgais David Morf (1770-1773) construì il bajetg, cumbain che quai pertutgava surtut l'interiur ed il giardin baroc appartegnent – oz enconuschent sco Parc da Fontana. D'ordaifer para il bajetg dentant plitost modest. L'onn suenter la registraziun da nossa fotografia han ils ertavels vendì il bajetg, ch'era stà dapi sia construcziun en possess da la famiglia da Salis, a la Banca Chantunala Grischuna vischinanta. Quella l'ha renovà 1957/1958 e dat dapi lura a locaziun il bajetg a la Dretgira chantunala.

La fotografia deriva dal relasch da la chasa editura da cartas postalas da Son Gagl Foto Gross, che concentrava sias activitads vastas surtut sin la Svizra Orientala. L'archiv dal stadi dal chantun Grischun ha surpiglià ils negativs dals motivs grischuns. Radund 3000 fotografias dals onns 1922-1971 stattan a disposiziun per chargiar giu sin il sistem d'infurmaziun d'archiv da l'archiv dal stadi.

Autur: Georg Heinzle, Archiv dal stadi dal Grischun

Staatsarchiv Graubünden / StAGR N3.1356/ Chur, Poststrasse mit Salishaus (1955) / Fotograf: Foto Gross, St. Gallen / CC BY-SA 4.0 / Archivinformationssystem Staatsarchiv Graubünden.