Edifizi nov pumpus a la plazza da la posta (1902-1904)
Edifizi nov pumpus a la plazza da la posta (1902-1904)
La fotografia mussa il suler d'arvieut magnific cun colonnas e pilasters da la posta principala anteriura a la plazza da la posta a Cuira. Oz sa chattan en l'edifizi la biblioteca da la citad ed in café. Il maletg n'è nagina fotografia spontana, mabain minuziusamain inscenà; cun plirs mastergnants sin differents nivels, tuts vieuts vers il fotograf. Ils dus umens davosvart stattan temerariamain sin ina construcziun da puntanadas da lain. En la part centrala lavura in stuccatur sin ina stgala vi dal capitel d'ina colonna. Davanttiers battan dus umens en furma crappa. La fotografia dat in'impressiun da la maniera, sco ch'i vegniva bajegià avant radund 120 onns.
La concepziun da la posta è vegnida dal Neuchâtelais Jean Béguin (1866-1918) e da Theodor Gohl (1844-1910), l'architect suprem en la Direcziun da las construcziuns federalas. Dapi ils onns 1880 tardivs lascheva la Confederaziun bajegiar postas monumentalas en tut ils lieus pli gronds da la Svizra. Il stil architectonic s'orientava a la renaschientscha taliana. A Cuira vegniva quest stil represchentativ da lez temp resentì sco ester e pumpus.
La posta da Cuira è vegnida construida tranter 1902 e 1904. Ils dus fotografs Gottlieb Lienhard (1861-1916) e Rudolf Ludwig Salzborn (1864-1947) avevan l'incumbensa da documentar fotograficamain il progress da la construcziun da dadens e d'ordaifer. Cunquai ch'els avevan lur atelier, fundà 1889, direct visavi la posta en il lieu nua che stat oz la Banca Chantunala Grischuna, pudevan els documentar la construcziun or da la proxima vischinanza.
Il relasch da Lienhard & Salzborn tutga tar ils inventaris fotografics ils pli impurtants dal chantun Grischun e sa chatta en l'archiv dal stadi chantunal. Las radund 3'000 fotografias èn digitalisadas e pon vegnir consultadas en il sistem d’infurmaziun d'archiv da l'archiv dal stadi. Tar la fotografia mussada sa tracti d'ina copia invertida dad in negativ da vaider.
Autura: Nicoletta Gschwend, Archiv dal stadi dal Grischun
Staatsarchiv Graubünden / StAGR FN IV 24/30 C 069 / Chur, Hauptpost im Bau (1889 - 1919) / Fotograf: Lienhard & Salzborn, Chur/St. Moritz / Archivinformationssystem Staatsarchiv Graubünden
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.