Davos da seniester: Lucas Caviezel, Jakob Caduff e Wieland Koch

davon da seniester:Daniel Voneschen,Peter Stoffel e Johann Peter Nold

"La musica da Pitasch ei vegnida fundada igl onn 1845" ! Aschia declara Jakob Cadetg-Frigg, naschius igl onn 1911 a Christian Joos, moderatur dil Radio Romontsch, en l'emissiun la marella, registrada igl onn 1982.

Jacob Cadetg-Frigg ei staus commember dalla musica ed ha frequentau il survetsch militar sco trumbettist. Leu sunava el la posauna, ella musica da Pitasch segidava el era cun sunar auters instruments. Tiels documents: Gia digl onn 1866 exista l'emprema fotografia e quei numnadamein sco ina musica reduzida da sis musicants en survetsch militar duront l'occupaziun dils cunfins.

Miu basat, Lucas Caviezel, naschius 1849 ha frequentau la scola da recrut muort la musica gia igl onn 1866 cun mo 17 onns! Quei per saver cuntinuar cun la musica militara dil battagliun da muntogna 90. (Schüzenbataillon 90) Era dat igl inserat da concert ensemen cul Chor Viril Ligia Grischa igl onn 1870 perdetga dalla activitad da quella musica. Era vegneva ei sunau per occurenzas en vischnaunca sco era eclesiasticas.

Fetg interessant ei, malgrad che Pitasch ei ina vischnaunca reformada, che la musica da Pitasch ha sunau per dabia processiuns en vischnauncas Lumnezianas, havevan quellas da quei temps neginas autras musicas instrumentalas en Val Lumnezia. Ina perdetga da quei han ins anflau en in scriver d'ina gasetta tudestga, la «Allgemeine Illustrierte Zeitung», da Frankfurt, che descriva « Das Passionsspiel in Lumbrein 1882.»

Punct allas 09.00 uras, suenter che la schuldada han giu dau las salvas ha la pintga musica instrumentala da Pitasch entschiet a sunar «Das ist der Tag des Herrn». Il plevon Casanova ha astgau beneventar ca. 3000 persunas! La fotografia digl onn 1927 ei ina dallas davosas formaziuns.

1930 entochen 1935 diregia Andreas Caduff la musica, pli tard han dabia commembers stuiu bandunar nies vitg per gudignar il paun da mintgadi egl jester. Mo ei dat aunc oz, ella tschunavla generaziun, principalmein dalla famigla Caduff, senza interrupziuns trumbettists en differentas musicas militaras ed ch'ein era restai burgheis da Pitasch.