Betg in pignol da Nadal: La fotografia mussa lavurers da construcziun ed ulteriuras persunas, che sa mettan en posa 1907 en la Giassa Sura a Cuira a chaschun da la ventschigliun da la chanalisaziun da Cuira. Vesaivels èn sper la decoraziun festiva er ils instruments e materials da lavur: Surtut badigls domineschan l'ensemble, vitiers vegnan martels, in livel e natiralmain bischens. Spezialmain remartgabel è la posa dal signur giaschent davantvart, che ha barattà sia palutta da miradur davant el cun ina iva abundanta.

La chanalisaziun da Cuira è vegnida construida ils onns 1905-1908, damai che las metodas per la dismessa d'aua persa usitadas avant – surtut tras la Plessur ed ils auals da mulin e tras chanals mirads, uschenumnads tombini – eran vegnidas giuditgadas betg pli suffizientas e nunigienicas. La construcziun era precedida da discussiuns intensivas davart il pro e contra da diversas variantas. La debatta aveva gia cumenzà la fin dil 19avel tschientaner ed è la finala vegnida conclusa cun dar liber las lavurs da construcziun 1905 tras ina votaziun communala. Las lavurs han custà sur 600'000 fr.

La fotografia è in "classicher", ch'è gia cumparida en pliras publicaziuns davart la tematica captivanta – ella simbolisescha l'arrivada dal temp modern er en il terratsch sut las vias da Cuira. Ella è part da l'inventari "Lienhard & Salzborn" da l'archiv dal stadi dal chantun Grischun, che vala sco in dals inventaris fotografics ils pli impurtants dal Grischun. Sco tut las fotografias da l'inventari stat ella a libra disposiziun online tar l'archiv dal stadi.

Autur: Georg Heinzle, Archiv dal stadi dal Grischun

Staatsarchiv Graubünden / StAGR FN IV 18/24 C 046 Chur, Obere Gasse, Kanalisation (1907) / Fotograf: Lienhard & Salzborn, Chur/St. Moritz / Archivinformationssystem Staatsarchiv Graubünden.