Tierm da cunfin, tschentaus igl onn 1715, denter la Lumnezia e Foppa, sin territori communal dallas vischnauncas da Cumbel e Luven. Dalla vart Lumneziana sut in bi reliev da sogn Murezi a cavagl, ch'ei il sigil cumin Lumnezia , "S DER GMEINT LANGNETZ", stat scret:

" JOHANN HEINRICH VON MONT, DER ZEIT LANDTAMEN IN LANGNETZ HAT DISEN MARKSTEIN LASEN MACHEN AUF BEFELCH EINES WOLWISEN RATHS DESSELBSTEN 1715" .

Dalla vart dalla Foppa, sut il reliev, il sigil dalla Foppa, "S DER GANSGMEIND IN DER GRUB", stat scret:

"MARCKSTEIN INDTZWISCHEN DEN GMEINDEN ILANTZ GRUAB UND LANGNETZ ZU ILANTZ UND IN DER GRUAB DISER ZEIT LANDTAMAN HERREN PITER ANTONI CASTELLI ST.NAZARO 1715"

Il crap/tierm, ca 1.60 m. aults, ei samentenius malgrad da tuttas auras detg stupent.

Mo in misteri ei per mei aunc oz buca schligiaus. Suenter il metter il tierm, 282 onns pli tard, numnadamein igl onn 1997, jeu erel da quei temps mistral dalla Foppa, decidan las autoritads cirquitalas Lumnezia e Foppa da schar allontanar il tierm en in luvratori din tagliacrappa. Ina restauraziun ei necessaria. Per allontanar mescal e schubergiar ils texts ei vegniu tratg en offertas. Cuort suenter la surdada vegn il tagliacrappa a Glion e declara ch'il crap da cunfin seigi gia schubergiaus e vesi ora bein ed enuorden. El manegi da schar il tierm leu nau ch'el ei.

Il misteri, tgi che ha fatg la breigia gratuita ei buca vegniu alla glisch. Il daner, lubius dils mistrals ei staus en cassa da cumin, denton buca fatg mescal! Oz stat il tierm aunc adina, suenter 305 onns, loschamein sper via Lumneziana ed ei ina biala perdetga dil temps vargau.