Baselgia da Son Peder a Mistail
Baselgia da Son Peder a Mistail
La fotografia da 1948 mossa gl'interiour dalla baselgia da Son Peder a Mistail ad Alvaschagn. Examinaziuns archeologicas on musso, tgi la baselgia all'antrada dalla tgavorgia da Meir è neida biageida anturn igl onn 800. Cun igls sies dus altars laterals e las treis apsidas (igls spazis semi-circulars davos igls altars) è Son Peder en exaimpel tipic per l'architectura da baselgia digl otgavel e novavel tschentaner. Durant chel taimp tutgiva la Rezia tigl reginavel franconic digls Carolings. Chel taimp caracteriso da profonda religiousadad cristiana ò influenzo l'istorgia dall'Europa scu strousch en oter. El è stagn colliia cugl nom da Carla igl Grond, tg'è prubablamaintg er sto an pussanza durant igl taimp tgi la baselgia da Son Peder è neida biageida.
La mobiglia sacrala baroca mussada segl maletg è neida allontanada an connex cun lavours da restauraziun 1968-1979. I resta la baselgia carolinga cun las sias picturas muralas fascinontas, uscheia scu tg'ella pò anc oz neir visitada. Ella è egna dallas pacas baselgias carolingas prest cumplettamaintg conservadas ansomma e represchainta en scazi cultural dad impurtanza enorma. La sia bunga conservaziun angraztga Son Peder a Mistail agl fatg, tgi la baselgia ò fermamaintg pers relevanza siva la disfatga dalla sia clostra appartenenta 1154. Uscheia davigl nign muteiv da biagier anturn la baselgia e transfurmar la substanza architectonica uriunda.
La fotografia totga tigl relasch digl affar da fotografia Foto Gross da Son Giagl, tgi era activ ainten l'antiera Svizra orientala. Igl archiv digl stadi digl cantun Grischun ò surpiglia chella part dallas fotografias tgi pertotga igl Grischun. Persungas interessadas pon piglier invista aint igl relasch aint igl sistem d'infurmaziun d'archiv digl archiv digl stadi, noua tg'ins po er carger giu fotografias.
Autour: Georg Heinzle, Archiv digl stat digl Grischun
Staatsarchiv Graubünden / StAGR N3.1092 Mistail, Kirche St.Peter, älteste Talkirche, erbaut ca. 8.-9.Jahrhundert (1948) / Fotograf: Foto Gross, St. Gallen / CC BY-SA 4.0 / Archivinformationssystem Staatsarchiv Graubünden.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.