Tgei, ils protestants van buca a priedi? Quella fotografia, ei po esser paucs onns avon ni suenter 1945, dat perdetga ch'ils da Pitasch mavan stedi a baselgia la dumengia, era sche Pitasch ei dapi 1530 ina vischnaunca reformada. Suenter priedi sesevan ils umens sil mir santeri per dar ina patarlada. Las femnas mavan a semtgar il furtem dalla dumengia.

Igl um il pli dretg ei il sulet catolic, numnadamein Gion Paul Capaul da Lumbrein. Gion Paul ei staus in fideivel fumegl tier la vieua e mumma da sis affons, Johanna Caviezel-Capeder, e quei dabia onns. Aschia ha la vieua, ensemen cun Gion Paul ed agid dils affons, saviu menar il menaschi puril entochen ch'il fegl Alexander ei staus carschius da surprender el. Siu bab, Christian Caviezel, ei morts igl onn 1942. Alexander haveva mo 10 onns, la sora pintga mo in per meins.