La fotografia digl onn 1911 muossa ina alpinista ed in alpinist duront l'ascensiun en direcziun Muot da Rubi. Davostier sestenda la vallada pittoresca "Val Frisal" sur Breil/Brigels. Spert sedrezza noss'egliada naven dalla femna giusut agl ur seniester enviers dretg e stat eri enamiez il maletg tier igl um che posescha da maniera suverana. Observond l'alpinista pli detagliadamein croda siu grond capi e sia greva stgira rassa en egl che para da trer anavos ella a val.

Nunintenziunalmein para la fotografia da resplender la rolla dalla dunna egl alpinismus l'entschatta dil 20avel tschentaner. Da gliez temps vegnevan las alpinistas bein buc pli recepidas sco excepziuns absolutas e fagevan pli e pli savens ina excursiun ella muntogna cun umens sco "cameratas da muntogna" – bein capiu era cun da quels che sudevan buc tier la parentella. Las "cameratas da muntogna" vegnevan denton buc consideradas sco partenarias egualas, mobein sco accumpignadras mudestias dils conquistaders masculins dalla pézza. La nova rolla dalla "camerata da muntogna" ha buc rebalzau las rollas dalla schlatteina. Quei semuossa era sin fundament dalla vestgadira dalla dunna sin la fotografia. La schelta da sia vestgadira per ir a cuolm era schizun suttamessa allas reglas strictas d'ina presentaziun conforma a siu stan e specificamein "feminina". Biaras alpinistas sedecidevan da scursanir lur rassa el meglier cass per in pèr centimeters e da purtar in grond capi che dueva proteger lur alva pial da vegnir brina. Quei era secapescha buc practic e fageva ei pli grev da suandar il pass dils umens.

Il maletg deriva dil relasch dalla famiglia Herold da Cuera, in dils biars relaschs privats che vegnan conservai egl archiv dil stadi dil Grischun. Il relasch cumpeglia 160 maletgs singuls ed albums fotografics cun maletgs ord la veta da differents commembers da famiglia duront il temps da 1850 entochen 1937.

Autura: Flurina Camenisch, Archiv dil stadi dil Grischun

Staatsarchiv Graubünden / StAGR FR-A Sp III/14x-004 Val Frisal, Bergsteiger und Bergsteigerin (1911) / Fotograf: Unbekannt / CC BY-SA 4.0 / Archivinformationssystem Staatsarchiv Graubünden.