La fotogradia ei ina carta postala da ca. ils onns 1930. Sch'ins mira bein pon ins ver la tabla da metal dall'anteriura ustria. Miu tat Jakob Caviezel, carschius si a Pitasch era secasaus ils emprems onns suenter las nozzas igl onn 1920 a Riein, il liug d'orgin da tatta Barla Caviezel, naschida Gartmann da Riein. La primavera 1928 ein els secasai a Pitasch ed han surpriu l'ustria cun il num "Wirtschaft zum Güner Kreuz" dils geniturs. Quei pon ins buca leger sin la tabla. Pli tard han els giu scret si "Restaurant Caviezel". Dapi igl onn 1963 han mes geniturs surpriu l'ustria ed menau quella entochen 1995. Quella mattatschetta po esser forsa mia onda Annamengia Bertogg-Caviezel. Pertgei Güner Kreuz? Da quei temps viandavan dabia jasters sur il " Günerlückli "encunter la Val Stussavgia.

La fontauna quadra surveva buca mo per buentar animals, ella era, aunc cun treis begls pli pigns la reserva d'aua en in cass da barschament. L'emprema sprezza da fiug ei vegnida cumprada igl onn 1915. Igl onn 1951 ha Pitasch menau l'aua dils cuolms Selvadis en vischnaunca per casadas ed indrezs da fiug. Aschia ha la fontauna quadra piars la funcziun da reserva d'aua ed ei vegnida remplazada cun in begl liung sco buantader ed in begl pli pign per lavar resti ed autras caussas.