In text da miu bab AUGUSTIN MANETSCH:

IL PLAZ DA PAUSA

En quasi mintga vitg anflan ins in plaz da pausa. Quei plaz nua chils affons da scola astgan sedivertir denter liungas e stentusas uras da scola. E tgei fan els tut sin quels plazs? Tgi fa giugs, auters patarlan, in e lauter empren aunc dabot enzatgei per l'ura che vegn. Ed ei dat lu aunc adina peda per ina biala paterlada cun brattar novitads. Magari ei il plaz da pausa era il liug per mussar las forzas, sin ina moda ni sin lautra.

E las scolastas ed ils scolasts, tgei fan lezs? Els fan survigilonza. Ina jamna quel, ina jamna tschel. Ed ils auters van a beiber in caffè.

Els biars da nos vitgs fuva la scola pli baul enzanua sper la via principala. Mo ei ha lu adina dau dapli vehichels, autos che mavan pli spert, aschia che las vischnauncas han stuiu encurir in auter plaz per la casa da scola ed in auter liug per il plaz da pausa.

A Mustér ei quei iu aschia: Ei deva pliras scolas per il vitg entuorn. La vischnaunca ha lu cumprau in grond prau a Cons per haver plaz avunda per la scola. Oz dat ei leu treis casas da scola. In tec zuppada la scoletta, lu la scola per quels dalla primara e la scola per quels dalla reala e secundara. Ed in grond plaz da pausa per tuts.

Il plaz da pausa ei circumdaus da cuolms. Treis pézs cun il num Péz Ault vesan ins da leu anora. E sch`ins less cuntinuar cun tut ils cuolms veseivels leu, stuessan ins dir sco il poet da Segnas, sur Giusep Durschei, ha scret: O tgei bi rudi!

En quei rudi da cuolms anflan ins in tut special, e quel ei era il pli damaneivel dil vitg, numadamein Lumpegna. Igl ei ni in cuolm ni in péz, igl ei semplamein ina specia da crest empau pli grond. Mo Lumpegna ha in contact tut special cun il plaz da scola. In um crap stat leusi e mira giuadora. Il meglier vesan ins el ils dis clars d`atun e las damauns sereinas dil mars ed avrel.

Igl um crap. El para da star leusi sco in vut e da s`empatschar pauc dalla truscha sin nies plaz da pausa. Da quei um crap raschunan ins da tuttas varts. "Ha el buca lungurus leusi?" ein entgins affons sedumendai. "Nus duessan ir siado e far ina viseta ad el."

In bi di eis ei lu stau aschilunsch. Els ein i a Sogn Placi, lu da Pegn Rodund si tras ils stavels dalla alp ed arrivai si tier igl um da crap.

Ei han plidau cun el. Ed el ha dau risposta. Buca cun vusch da carstgaun. La vusch digl um da crap audan ins el vent che tgula entuorn el. Ei drova nuota esser in vent da stemprau per udir sia vusch. Schizun el vent fin che muenta mo ils pastgs ils pli falombers san ins udir sia vusch. Ed ussa stuein nus aunc saver tgei che quels affons han plidau cun igl um da crap. Igl emprem han els fatg ina damonda tipica per affons. "Eis ei propi buca lungurus da star si cheu dis ed jamnas e mirar giu sin quels da Mustér?" Igl um ha crap ha ris :" Jeu sai dil vitg anora fetschel jeu ina pareta sco in utschac. In punct ner adina el medem liug. Mo quei cugliuna. Jeu sun buca persuls si cheu. Nus essan ina entira famiglia e sebrattein cun nossa guardia. Mei aunc in pèr tschien meters da cheu si, si leu davos il crest, leu dat ei ina surpresa per vus:"

Ed ils affons ein i ed han veramein anflau els. Ina entira famiglia dad umens crap. Ina matta crap ha detg ad els: " Saveis, igl ei propi aschia, nies dacasa ei en cheu davos il crest. Ed in ha adina dad esser o leu sum e mirar giu el vitg. Di e notg. Secapescha che nus fagein quella lavur en roda. " E tgei scheis vus lu dil plaz da pausa cun sia truscha? " vulan ils giuvens alpinists saver. En in emperneivel discuors han ei intervegniu tut quei ch`els levan saver. Mo il davos ha la mumma crap detg tut da serius: " Giu el vitg astgeis vus raquintar nuot. Tgi che vul saver enzatgei duei vegnir si sez a tschintschar cun nus."

E la famiglia crap ei aunc adina si leu e spetga ch'enzatgi auter vegni si e fetschi ina viseta ad els.