La prüma chasa da scoula da Sta. Maria
La prüma chasa da scoula da Sta. Maria
Als 7 avrigl 1846 dumonda il cumün da Sa. Maria al Chantun Grischun üna subvenziun per pudair fabrichar üna chasa da scoula. Als 15 avuost 1846 respuonda la cumischiun chantunala per las scoulas cha'l Chantun saja pront da sustegner quist proget da fabrica e cha'l cumün dessa inoltrar ils plans.
La dumonda da subvenziun haja da gnir repetida l'on chi vain e cha Sa. Maria vegna miss perintant sülla glista dals cumüns chi s'han interessats per ün subsiddi chantunal. Als 1. avrigl 1847 retuorna la cumischiun chantunala ils plans da fabrica cun alch propostas da müdamaint.
Cha l'indschegner von Salis ha fat. I's po dimena cumanzar culla fabrica da la chasa da scoula. Als 9 lügl 1847 scriva la cumischiun chantunala cha'l Chantun haja decis da pajar üna « premia » (subvenziun) da 300 florins.
Nossa vita: in tschientenari istorgia svizra en maletgs
Als 18 october 1849 salva il cussagl da scoula üna tschantada per preparar la festetta d’inauguraziun e per organisar il cumanzamaint da l’instrucziun aint il fabricat nouv. Dürant la tschantada capita üna surpraisa : « … schi che dvainta ? Nos venerabel vaschin Sr. Ml. Adom Bott intra in stüva, remetta la somma da 1000 f. in maun del smord & comovü Cussegl da scolla in schand chia que saja ün Dunatif chia Sia Chara figlia Duonna Anna Sallis fa… » Als 4 november 1849 ha lö la FESTA D’INAUGURAZIUN DA LA CHASA DA SCOULA. Da quella festa as saja amo divers detagls »: Il cumanzamaint vain fat davant la chasa da Ml. Adom Bott. Las chasas in cumün d’eiran gnüdas ornadas cun cranzs. Eir la chasa da scoula d’eira imbellida cun cranzs ed inscripziuns. Per exaimpel d’eira scrit sur la stanza da scoula : « Chi vuol cultivatiun, tscherchia l’instructiun, chi vuol salüd, tscherchia la virtüd. » Sur la « Staunza dal Magistrat » d’eira la seguainta inscripziun : « La jüstia adauza la Natiun, l’injüstia maina alla perditiun. » Sur il cateder dal magister d’eira il vers : « Imprendà da mai & sajat hümels da cour, perche Eug as muos la via dal salüd con amur. »