«Ils 5 december 1893 s’ho chatto ad Albert Frischknecht, il possessur da la pitschna ustaria Giftlädeli a Samaden, mort in sia butia, tschanto sün ün baunch da butia, intuorn el üna granda sanguineda». La victima ho gieu numerusas feridas vi dal cho ed ün tagl fop vi dal culöz chi tendschaiva da la vart dretta fin a l'uraglia schnestra. Tenor il rapport medicinel saja la victima gnida «s-channeda = schächten» ed hegia pers tuot il saung». Uschè sto que scrit illa sentenzcha dal güdisch chantunel dal Grischun dals 15 meg 1894.

Suspetto es dalum gnieu il marangun Nicolaus Mathis da Luzein chi'd es gnieu vis la saira dals 4 december cun la victima in sia butia. La fotografia our da l'acta il muossa in bouvas (=Handschellen). Ella es gnida fatta i’l atelier Carl Lang a Cuira, perque cha la pulizia svess nu possedaiva da quel temp auncha üngün apparat da fotografer. Il suspecto ho il prüm schnajo il melfat, zieva la perquisiziun da chesa ho el cufesso d'avair commiss l'aschaschinedi. El vain valüto scu «chastör, da ligerezza ed attacho a l'avriaunza». Il güdisch ho bain lascho valair tar l’imsüra penela la «educaziun manglusa da l’achüso» scu motiv mitigiant - pervi da la brutalited dal melfat e’l però gnieu sentenzcho a vainch ans chesa da correcziun ed a «suspensiun per vita düraunta da l’onur e’ls drets civils».

L'acta davart il mordraretsch as rechatta i’l Archiv dal stedi dal Grischun suot la signatura StAGR III 23 d 1.

Autura: Immacolata Saulle Hippenmeyer, Archiv dal stedi dal Grischun

Staatsarchiv Graubünden / StAGR FR XVIII / 015 Mathis, Nicolaus, von Luzein, 1894 wegen Raubmord verurteilt (Undatiert) / Fotograf: Carl Lang, Chur / CC BY-SA 4.0 / Archivinformationssystem Staatsarchiv Graubünden.