In fest misterius digl onn 1797
In fest misterius digl onn 1797
Il fest ei ca. 165 cm. liungs ed ei 224 onns vegls. D'ina vart ein l'annada, P. N. (Peter Nold, N il cuntrari) e dabia nodas casa entagliadas en, mintgamai en in dretganghel. Quellas nodas casa sesanfllan era el rodel dalla vischnaunca da Pitasch digl onn 1724.
Ils proprietaris dallas nodas casa ein Cadeg Christ, Chion Valentin, Cabach Gilli, Jori Cabalzar, Jacob Caviezel ed aunc bia auters. Da l'autra vart, medemamein era en dretganghels exact davos las nodas casa ein crenas liungas e cuortas entagliadas en.
Treis, ina ed ina mesa, treis, quater, tschun ed ina mesa ed aschia vinavon. Denton tgei muntada las crenas han saiel jeu buc. Pli probabel era quei fest en proprietad dalla vischnaunca ed surveva per trer la sort. Tgi sa guder l'alp Dadens e tgei purs cargan lur vaccas sin l'alp Dado? Per decider vegneva tratg la sort. Era retrer lenna da brisch decideva il trer la sort.
La sort vegneva aunc tratg avon paucs onns, denton cun las nodas casa, entagliadas en clavellas, ligiadas en in puschel. Pli probabel surveva il fest dallas nodas casa avon las nodas entagliadas sin clavellas lenn.
Sa enzatgi dapli da quei fest misterius? Vegneva ei era practicau en autras vischnauncas cun fests semeglionts?
Nossa vita: in tschientenari istorgia svizra en maletgs
Quei ei in grondius mussament, co ins mava cumineivel entuorn cul beins cumins sco nossas alps. In object fetg scars e precius!
Igl ei la mesadad d'in sistem da controlla. Mintga pur haveva siu toc lenn en sac (la "tezla") che corrispunda allas nodas entagliadas en quei lenn. Cunquei ch'il lenn vegn entagliaus el medem mument, veseivel per purs e signun, san ins la fin dalla stad metter per controlla in vid l'auter il fest cullas tezlas.
Vul gir, sche in pur ha per exempel treis vaccas (eventual treis strehs) ha el dabien in cert diember da magnuccas che corrispunda al latg da treis vaccas. Leva in pur cugliunar e far in streh dapli, havess ins il gi da scargada viu la differenza cul fest da controlla cheusura sil maletg.
Medemamein saveva la fumeglia d'alp buca cugliunar, cunquei ch'il pur haveva ils strehs silmeins per sia part sin sia "tezla".