Igl onn 1920 ha la societad d'alpicultura visitau l'alp Blengias sin territori communal dalla vischnaunca da Vrin. Cun cussegliar e sustener nossas alps vegneva ei era surdau diploms da renconuschientscha ad alps che vegnevan menadas e cultivadas en moda da lur cussegls e perscripziuns. Aschia ha la vischnaunca da Pitasch astgau prender encunter igl onn 1921 in diplom da renconuschientscha da quella organisaziun ch'ei vegnida fundada igl onn 1863 ad Olten ed exista aunc oz. (diplom mira cheu sut).

Ina interessanta historia ha l'alp Blengias. Il mistral, Bistgaun Antoni Casura da Falera, naschius igl onn 1799, ha cumprau l'alp Blengias igl onn 1832, per 10'000 flurins/Gulden. Ils vendiders eran ils renomai politichers dil temps dallas treis Ligias, Joh.Gaudenz von Salis Seewis (1762-1834) da Malans e Christoph von Albertini (1774-1848) da La Punt- Chamues-ch e Cuera. Igl onn 1841 e 1842 ei Bistgaun Antoni Casura staus mistral dil Cumin dalla Foppa. L'alp Blengias cun ses 150 dretgs d'alp ei aunc oz en possess dalla descendenza dil mistral Bistgaun Antoni Casura. Entochen igl onn 1967 vegneva ei caschau il latg da ca. 50 vaccas. Ils auters dretgs eran cargai ora cun biestga schetga. Suenter 1967 pasculeschan bietga schetga ed oz era vaccas mumma las pastiras dall'alp Blengias sut il pez Terri dadens igl uclaun Vanescha. Quei da dus purs da Falera ed in da Schluein.

Las indicaziuns da quella biala e liunga tradiziun haiel dils possessurs da dretgs dall' Alp Blengias, Raimund Blumenthal da Falera sco era da Geli Camenisch da Schluein. Grazia fetg.

Diplom per la vischnaunca da Pitasch 1921.

december 7th, 1921