Id es darcheu temp da chatscha! I dà be pacs temas chi occupan il Grischun dürant il mais settember tant sco quel. Blers sun in gir sco chatschaders e chatschadras, las cartas da menü aint illas ustarias cuntegnan darcheu trats da sulvaschina in tuottas variaziuns. Istorgias dad aignas o da las experienzas da chatscha d'oters fan la runda. La fotografia da l'atelier Feuerstein a Scuol es ün dals rars purtrets da chatscha chi tematisescha la chatscha sur la chatscha oura. Il purtret cha nus tuots cugnuschain es quel cun la bes-cha schluppettada per terra, e’l chatschader superbi chi va in schnuoglias. La cumposiziun da quist purtret nu correspuonda insomma na al tip «chatschader cun trofea». El muossa la duonna cun scussal net e grond curtè, pronta per tour oura il dadaint, il chatschader chi para da tgnair seis schluppet sco bastun, ed il tschiervi chi para da far la posa. Tuots trais guardan aint illa camera e vegnan muossats da listessa maniera sco protagonists. Il chatschader es sco suvent immez. Il scussal cler ed il curtè da la duonna attiran però sia ögliada in möd magic ed ella survegn üna gronda preschentscha. Eir il tschiervi es prominent sül purtret, perche el survain il plü grond spazi ed ils pizs da sias cornas chi proseguischan la lingia superiura da la gruppa da figüras, schi, accentueschan perfin seis punct il plü ot.

Il purtret es ün digitalisat d'ün vaider negativ da l’inventar Foto Feuerstein, Scuol ed el es gnü fat tanter ils ons 1930 e 1950. Hoz po el gnir consultà online i’l sistem d'infuormaziun da l'archiv dal stadi sco part da l'inventar fotografic.

Autura: Brigitte Aregger, Archiv dal stadi dal Grischun

Staatsarchiv Graubünden / StAGR N1.E-1510-NG Jäger (Domenic Pua) mit Frau und erlegtem Hirsch (ca. 1910 - ca. 1949) / Fotograf: Foto Feuerstein, Scuol / Archivinformationssystem Staatsarchiv Graubünden.