San Murezzan es gnieu tschernieu scu lö dals gös olimpics d'inviern dals 11 fin ils 19 da favrer 1928. Decisiv es dal sgür sto il fat cha San Murezzan as vaiva sviluppo già daspö divers decennis ad ün dals lös da vacanzas ils plü renomos da las Alps. Que sun stos ils prüms gös d'inviern independents chi nu sun gnieus realisos in cumbinaziun cun gös da sted. Da quel temp as trattaiva per granda part d'üna occurrenza d’homens; las duonnas d’eiran be rapreschantedas illas disciplinas da patinagi artistic. Il center dals gös d'inviern d’eira il stadion da glatsch «Badrutts Park» a San Murezzan. Il stadion vaiva üna surfatscha da glatsch natürel da 30 sün 60 meters e vaiva plazza per 4’700 aspectaturas ed aspectatuors.

Sül purtret vzainasa üna scena dal matsch da hockey Canada cunter la Svizra. Que chi do in ögl es la mandura vaira ligera dals giuveders in conguel cun hoz. Els vaivan guaunts da stoffa u da chüram e schingeders per la schnuoglia, però ingüna chaplina. A’s stu però savair cha fin ils ans 1920 gniva il puck giuvo da principi plat, uschè cha'l prievel da feridas d'eira ün pô pü pitschen cu hoz. Il match manzuno haun pers ils Svizzers cun 0:13. Ils grands favurits dal Canada guadagnan la medaglia olimpica i'l hockey sün glatsch ed il terz titel da champiun mundiel. Per la Svizra hegia que bastieu dal 1928 per bruonz.

Il purtret es gnieu fat dal fotograf professiunel da San Murezzan Othmar Rutz (1879-1961). El deriva da la collecziun da fotografias da la Viafier retica fatta per intents da reclama. Hoz es la collecziun accessibla i’l Archiv dal stedi dal Grischun.

Autura: Immacolata Saulle Hippenmeyer, Archiv dal stedi dal Grischun

Staatsarchiv Graubünden / StAGR FR XXXIX / 1799 St. Moritz/ Oberengadin, Eishockeymatch Kanada gegen die Schweiz (1928) / Fotograf: Othmar Rutz (1879-1961), St. Moritz / CC BY-SA 4.0 / Archivinformationssystem Staatsarchiv Graubünden.