Hotel Albula Casti /Tiefencastel istorgia
Hotel Albula Casti /Tiefencastel istorgia
Igl Hotel Albula a Casti è nia biagia igl onn 1850 da Franz Schnöller tgi ò mirido Magdalena Capeder, darivanta da Dèl (sur Salouf). Gl’era igl taimp siva dall’ erecziun dalla veia nova carrabla siva digls onns 1820 tgi manava da Coira sur igl Pass digl Gelgia an Nagiadegna ed Italgia. Chels onns ò sies vaschign a Casti, la famiglia Balzer er sangaschea ferm pigl trafic dalla posta da tgavals.
Franz Schnöller (1813-1904) è rivo no digl Lechtal/Tirol noua tgi la schlattagna Schnöller è anc oz derasada. El è rivo scu cromer cun igl «scherl ». Dalunga ò el via igl avantatg digl pitschen paeis Casti ed ò davert ena pitschna buteia da colonials. Inspiro digl furnitour Bossi da Clavenna/Ital. ò el gia success ed uscheia biagia vetiers igl Hotel Albula. Igl maletg lascha sacorscher bagn igl stil architectonic taliang digl nov erigia Hotel Albula.
Franz Schnöller e sia consorta Capeder on gia ena gronda famiglia. Tranter oter er igls fegls Peter ed Anton. Tals en davantos medics. Peter Dr.med. curativ a Tavo ed agl Bogn dad Alvagni. Anton scu Dr.med. a Tavo. Igl fegl vigl, Christian Schnöller (1853-1937) tgi ò marido Hedwig Schuler (1868-1935) da Bogn Ragaz è sto igl hotelier successour agl Hotel Albula. El veva fatg gronda carriera d’otel e manava en taimp er igl Kurhaus Bogn Alvagni. La famiglia da Christian e Hedwig ò gia catter unfants digls cals igl fegl vigl Christian Schnöller (1899-1959) tgi è rasto nubil ò mano anavant cun sustign da sia sora Berti igl Hotel Albula. Siva dalla mort da Christian Schnöller, on sies nev Rico Schnöller tgi ò spuso Ursi Uffer da Savognin surpiglia igl travagl e mano tal cun grond success ainten igl avigneir. Igl hotel Albula è nia angrondania e renovo, dasperas òn els anc cumpro vetiers igl onn 2000 igl vischinant Hotel Julier.
Igl Hotel Julier, era nia biagia igl onn 1875 d'en Signour Lanz, prubabel possessour ni paraint digls Lanz's digl Hotel Post a Beiva. Siva è el nia an possess digls irtavels dalla famiglia Arthur Bossi.
La successiun d’igl travagl digl Hotel Albula e Hotel Julier a Casti schea ainten igl mangs da la giovna Famiglia Seraina Schnöller-Schuler. (daple sur dalla famiglia Schnöller varda sot Hotel Albula Casti – istorgia).
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.